Нөхрийнхөө найзтай дотносох хэрэггүй

Гэр бүлийн хууран мэхлэлтийн хор уршгийн талаар бид мэднэ. Гэхдээ уучилж болшгүй зүйл бас байдаг байна. Та нөхөртөө хичнээн дургүй, залхсан, араар тавих сонирхолтой байдаг ч түүний найз нөхөд, танилыг сексийн объект бүү болгоорой.
Хэрэв ийм харьцаа үүсвэл бараг тэр өдөр нөхөр чинь мэдчих аюултай. Эрчүүд аман дээрээ “нөхөр чинь хэзээ ч мэдэхгүй” гэж баталдаг ч үүнд бүү үнэмшээрэй. Та нөхөртэйгээ салах дээрээ тулсан ч ийм тэнэг алхам хийж өөрийгөө гутаах хэрэггүй. Нэр цэвэр салах танд ашигтай. Үүн дээр эрэгтэй, эмэгтэй хүмүүсийн онцлог ч харагддаг.

Эрчүүд эхнэрээ огт танихгүй хүнтэй сексийн харьцаа үүсгэснийг мэдвэл уурлах нь гарцаагүй. Гэхдээ уучилна. Яагаад гэвэл тэр хүнийг танихгүй. Харин хамт ажилладаг ч юм уу найз нөхөд, танилтай нь ийм харьцаа тогтоовол хэзээ ч уучлахгүй. Энэ бол түүний нэр хүндийн асуудал учраас.

Эмэгтэйчүүд энэ асуудал дээр арай өөр ханддаг. Нөхөр нь найз бүсгүйтэй нь унтсаныг санамсаргүй мэдчихвэл (найз бүсгүй энэ асуудлыг хэзээ ч ил гаргахгүй) цамнаж уурлах нь тодорхой. Гэхдээ уучилна. Найз бүсгүйгээ уучилж чадна. Хачирхалтай нь найз бүсгүй нь ч мөн тэднээс дөлөхгүй, хэвийн харьцаатай байна.

Харин үл таних эмэгтэйтэй нөхөр нь жиг ургуулсныг мэдвэл эхнэр уучлахгүй. Түүнд аймшигтай, байж боломгүй доромжлол, хууран мэхлэлт мэт санагдана. Тэрээр үл таних бүсгүйг сэтгэлдээ гайхамшигтай гоё хүүхнээр төсөөлнө. Тэгэх тусам атаа жөтөө, хор шарандаа “буцалдаг”. “Үнэн хэрэгтээ тэр нь өөрөөс нь царай муутай байсан ч эмэгтэйчүүд үүнд тайвширахгүй. Заавал нэг илүү талыг нь олж харж, өөрийгөө шаналгадаг. Иймд араар тавихдаа ч эхнэр (нөхөр)-ийнхээ онцлогийг харгалзаарай.

/Хань/