Дуучин Ч.Ану: Би аз жаргал, хайр сэтгэлийг мөнгөөр солих хүн биш

Охидын “Гала” хамтлагийн дуучин Ч.Ану бие дааж уран бүтээл туурвисаар багагүй хугацаа өнгөрчээ. Тэрээр “Хөвгүүн” цомог, “Мөрөөдлийн…” нэртэй дабль CD гаргаж, хоёр удаа нүсэр тоглолт хийн өсвөр насныхан болоод залуусын шүтээн болж чадсан залуу уран бүтээлчдээс анх удаа “Хөөрхөн дэлхий” хүүхдийн хөгжлийг дэмжих сан байгуулж дэргэдээ “Хөөрхөн дэлхий” тоглоомын газар нээж, “Хөөрхөн дэлхий” нэртэй хүүхдийн дууны цомог гарган үнэнч бацхан фэнүүдэдээ бэлэг барьсан юм. Бие даасан уран бүтээлээ эрч хүчтэй туурвиж яваа дуучин Ч.Анутай уулзаж ярилцлаа.

-Дуучин Ч.Ануг суулийн үед телевизээр их харах болжээ. Уран бутээлийн олз омог ихтэй байгаа бололтой?
-Юуны өмнө “Хүмүүс” сонины нийт уншигчдад энэ өдрийн мэндийг хүргэе. Би энэ сарын 18-нд Эрдэнэт хотноо “Номин Эрдэнэт” худалдааны төвийн хүсэлтээр “Хөөрхөн дэлхий” анхны бие даасан тоглолтоо хийгээд ирлээ. Тоглолт маан ь 3000 үзэгчтэй “Спорт комплекс”-д нь маш сайхан уур амьсгалтай болж өнгөрсөн. Уг нь энэ тоглолтоо хүүхдийн баярт зориулж хотдоо тоглох байсан ч Энтеровирус-71 өвчнөөс болж хойшлогдсон юм. Харин миний хоёр дахь бие даасан “New brilliant” цомгийн ажил дууссан. 7-р сарын дундуур худалдаанд гарна. Энэ цомогт багтсан шинэ дуунууддаа клип хийлгэсэн, телевизүүдээр цацагдаж эхлээд байна. “New brilliant” цомог маань залуучуудад зориулсан электро хаус стилийн цомог. Өмнө нь хүүхдэд зориулж уран бүтээл туурвиж байсан бол энэ цомог маань залууст хандаж буй эхний уран бүтээл гэж ойлгож болно. Энэ цомог намайг өөрчилж, боловсрол, имидж, хөгжмийн чанар, цаашлаад уран бүтээлч хүний хувьд дуулах тал дээр ч нэлээн их өөрчлөлтийг шаардсан. Шинэ уран бүтээлээ дагаад шинэ өөрчлөлт их хийж байна.

-Уран бүтээл болоод гадаад төрхөндөө шинэ өөрчлөлт хийх болсон шалтгаан юу байв?
-”Гала” хамтлагийг гол төлөв хүүхэд багачууд. сонсдог учраас уран бүтээлийн маань дийлэнх хувийг хүүхдийн дуу эзэлдэг байсан. Монголын рок попын ертөнцөд хүүхдэд зориулж цомог гаргасан хамтлаг, дуучид байдаггүй юм билээ. Тиймээс Монголын хүүхдийн дуу зохиогчдын холбооноос санал тавьснаар “Хөөрхөн дэлхий” хүүхдийн дууны цомгоо гаргасан. Би залуу хүн. Залуустаа зориулсан уран бүтээл хийе гэж төлөвлөж байсан юм. Үзэгчдээс ч надад санал тавьж, санаа өгснөөр уран бүтээлийн өөрчлөлтийг зоригтой хийлээ. Урлагт заавал хөгжил дэвшил байх ёстой. Тиймээс Галагийн Ану хурц тод өнгөнөөсөө татгалзаж, стиль имиджээ өөрчилж, эмэгтэйлэг болж байна. Урлаг хүнийг яаж өөрчилж болдгийг. харуулахыг зорьж явна.

-Стиль имиджээ өөрчлөхөд хэцүү зүйл гарч байна уу?
-Хүндрэлтэй зүйлүүд байлгүй яах вэ. Шинэ цомгийн маань продюсероор ажилласан Б.Наранзун ах англи хэлээр дуулахыг санал болгосон. Би мэргэжлийн англи хэл эзэмшээгүй болохоор бага зэрэг хүндрэлтэй байсан. Манай залуучууд өндөр боловсрол, мэдлэгтэй болсон. Тэдэнд зориулсан уран бүтээл сайн чанартай байх ёстой учраас маш их хичээсэн. Хүн өөрөө урлагт хайртай, хийж буй зүйлдээ хүсэл сонирхолтой байх юм бол ямар ч зүйлийг өөрчилж, хийж болдог юм байна.

-Урлагийнхныг нийгмээсээ нэг алхмаар түрүүлж явах ёстой гэдэг. Үүний тулд өөрийгөө хэрхэн хөгжүүлж байна вэ?
-Урлагийн хүн бусдаас нэг ч бус арван алхмын өмнө алхах ёстой байх. Гэхдээ заавал урлагийн хүн гэлтгүй залуу хүн бүр мэдээллийг цаг алдалгүй авч байх ёстой. Дэлхийн нэг захад болж байгаа үйл явдлын мэдээллийг тэр цаг мөчид нь авч чадахгүй бол мэдээллээс, цаг үеэсээ хоцорч байна гэсэн үг. Миний хамгийн том шаардлага бол мэдлэг боловсрол, мэдээллээр баялаг байх юм. Тэр ч үүднээсээ би “Хөөрхөн дэлхий” төрийн бус байгууллагыг ажиллуулж, байнга өөрийгөө хөгжүүлэхийг хичээж, интернеттэй байнга найзалж байна. Хамгийн гол нь намайг өсвөр насны . хүүхдүүд илүүтэй харж, үг яриа, үйл хөдлөлийг дуурайж байдаг болохоор би тэдэнд зөв үлгэрлэх ёстой гэж боддог.

-Залуухан, дуучин бүсгүй гоо сайхандаа цаг гаргаж чадаж байна уу?
-Урд нь “Гала” хамтлагт байхад өглөө гэрээсээ гараад л үсчин, гоо сайхан гэдэг байлаа. Одоо уран бүтээл, тоглолт, цомог, Үөрийн бус байгууллага, хүүхдийн тоглоомын газар гээд ажил их болохоор үнэндээ гоо сайхандаа зориулах цаг гарахгүй л байна. Нэг талаар би өөрийнхөө төлөө амьдарч байгаа ч юм шиг. Нөгөө талаас урлагийн хүн бусдын төлөө амьдардаг юм шиг санагддаг. Гэхдээ би гоё сайхан харагдах, гадаад өнгө үзэмжнээсээ илүү ирээдүй, алс хэтээ харсан бүтээлч ажил хийхээр зорьж, цаг заваа зарцуулж байна.

-Чамайг хөхөндөө мэс ажилбар хийлгэснээс болж бие нь муу байгаа. Аав шигээ насны эртэй амраглаж байна гэсэн мэдээлэл цацагдсан. Энэ үнэн үү?
-Эрдэнэт хотод тоглолтоор явж байхадтийм мэдээлэл гарч, ээж минь хамгийн түрүүнд утасдаж хэлсэн. Мэдээллийн дагуу шалгахад захиалгаар хүн бичүүлсэн байсан. Өмнө нь миний талаар жижиг сажиг мэдээлэл гарахад дуугүй өнгөрөөдөг байсан. Гэтэл энэ удаад миний нэр хүнд, эмэгтэй хүний гоо сайханд халдаж, намайг доромжилсон учраас би энэ асуудалд анхааралтай хандаж байгаа. Би хэзээ ч аз жаргал, хайр сэтгэлийг мөнгө төгрөгтэй холбож, өөрийнхөө хүслээс гадуур сонголтхийххүн биш. Надад гэр бүлийн сайхан хүмүүжил, эзэмшсэн боловсрол бий. 17-хон насандаа олж авсан “Гала” хамтлагийн нэр хүнд байна. Би хэнээс ч, юу ч гуйхааргүй амьдарч чадаж байна. Гэтэл намайг ингэж бичсэнд үнэхээр гайхаж байна. Хэрэв энэ мэдээллээ үнэн гэдгийг нотлох юм бол би тайзаа орхиход ч бэлэн байна.Учир нь намайг буруу үлгэр дууриалалтай байвал олон мянган хүүхэд багачууд сөрөг хүмүүжил олно шүү дээ.

-Гадаадын ихэнх одууд гоо сайхны мэс ажилбар хийлгэсэн байдаг. Чи энэ тал дээр ямар бодолтой байдаг вэ?
-Би гоо сайхны мэс ажилбарыг үгүйсгэдэггүй. Эмэгтэйчүүд гоё сайхан байх нь юу нь буруу байх вэ дээ. Харин миний хувьд мэс ажилбар хийлгэх шаардлага байхгүй. Тэгээд ч би “Гала” хамтлагийг байгуулснаас хойш нэг хоног ч амрах завгүй хөдөлмөрлөсөн. Хамтлаг байгуулах үед би 56 кг байсан бол өнөөдөр 46 кг болж турсан байна лээ. Би хоёр жилийн өмнөхөөсөө их өөрчлөгдсвн. Урлагийн хүн ийм богино хугацаанд өөрчлөгдөж болдгийг өөр дээрээ мэдрээд явж байна Тэгээд ч би аав ээжээс заяасан биедээ сэтгэл хангалуун явдаг. Үүнийг заавал мэс ажилбартай холбох шаардлагагүй.

-Найз залуутай юу. Ямар залуу таалагддаг вэ?
-Би найз залуутай байсан. Бид хоёр харилцаагаа таслаад жил зургаан cap боллоо. Одоохондоо надад болздог залуу ч байхгүй байна. Ганцаараа уран бүтээл хийх гэж хичээж, хөдөлмөрлөж яваа энэ үед урмыг минь хугалсан худлаа мэдээлэл тарааж байгаад гомдолтой байна. Урлагийн хүнийг маш сайн ойлгодог, гэр бүлийн хүмүүжил сайтай, муу зуршилгүй, эмэгтэй хүнийг хүндэлдэг, хамгийн гол нь үнэнч залуутай найзлахсан гэж боддог. Хүн болгон төгс байдаггүй шүү дээ. Надад ч сул тал бий. Хамгийн гол нь хүн зүрх сэтгэлээ л дагах хэрэгтэй юм. Эмэгтэй хүн болгонд зөн совин байдаг. Би аливаад маш няхуур ханддаг. Хайр дурлалын хувьд ч тийм байхыг хичээдэг. Хүн ганцхан удаа амьдрах учир хайр дурлал үнэ цэнэтэй байх ёстой болов уу. Өөртөө хамгийн их таалагдсан, намайг хайрлаж чадах хүнтэй л гэр бүл болно доо. Би Ану гэдэг хүний түүхийн хуудасны эхлэлийг тавих гээд явж байна. Миний өмнө маш урт зам бий. Тэр замаар маш зөв, шударга хөдөлмөрлөж амьдрахыг хичээж байна.

-Сексийн тухайд бодлоо хуваалцаач?
-Манай аав, ээж их зарчимч хүмүүс. Хүүхдүүдээ маш чанга, хатуу хүмүүжүүлсэн. Би багадаа зуслан явж үзээгүй. Архи, тамхи хэрэглэх, ямар нэг муу зуршил байхгүй, шөнийн клубт ч ордоггүй. Сексийг зөвхөн хайртай хүнтэйгээ хийх нандин харилцаа гэж боддог. Энэ харилцаанаас маш олон зүйл урган гардаг.

-”Гала” хамтлагийн нөгөө гишүүн Болорооо хаана юу хийж яваа вэ?
-Болороо маань энэ жил Хүмүүнлэгийн их сургуулийг англи хэлний орчуулагч мэргэжлээр төгссөн. Би “Гала” хамтлагт уран бүтээл хийхээ больсон нэг жилийн хугацаанд сургуулиа төгссөн.Хуульчхүнийуншиж мэдэх ёстой бүх зүйлийг нөхөж авахын тулд өдөр шөнөгүй хичээллэсэн. Бид нэгдсэн уран бүтээл хийж ирэх есөн сараас гаргахаар ярилцсан байгаа. Шинэ стиль, имиджийг бүрдүүлж, шинэ уран бүтээлээрээ нэгдэж фэнүүддээ бэлэг барих болно.

-Удахгүй сонгууль болно. Хэр идэвхтэй оролцож байна даа?
-Залуус бид сонгуульдаа идэвхтэй оролцох ёстой. Залуучууд бидний оролцоо, сонголт маш хэрэгтэй шүү. Өнөөдөр бид хүссэн зүйлээ хийхэд янз бүрийн саад бэрхшээл их гарч ирдэг. Тиймээс бид улс орноо хөгжүүлэх, нийгмээ зөв чиглүүлээд явах хүнийг сонгож чадвал бидэнд тулгамдаад байгаа асуудлууд маргааш үгүй болно.

Source: Хүмүүс