“Lady Boy гэж хэн бэ…”

Азийн орнуудаар өргөн тархсан Lady boys буюу транс-сексиуалистүүд /хос хүйстэн/ нь эмэгтэй хүн шиг хувцаслан маягладаг, хүйсээ солиулсан эрчүүд юм. Нэгэн цагт дэлхий нийтээрээ тэднийг үзэн яддаг байлаа. “Гаж донтнууд” хэмээн нэрлэгдэж, олонд нүд үзүүрлэгдсээр ирсэн энэ хүмүүс одоо олон оронд хүлээн зөвшөөрөгджээ. Тэр ч бүү хэл хамгийн сайхан хүүхнүүдийнхээ тоонд оруулж, унтлагынхаа өрөөнд зургийг нь залж, үндэсний баатар мэт үздэг орон хүртэл байх юм.

Зарим улсад тэдний дунд гоо бүсгүй шалгаруулах тэмцээн жил бүр зохиогддог бөгөөд ялагч нь “мисс”-ийн алдрын титэм зүүж сонины эхний нүүрэнд залардаг, үүнийхээ хэрээр алдаршдаг аж. Эдгээр хүн хүнээс гажууд ч юм шиг Lady boys орон бүхний түүхэнд өөр өөр замыг туулж, хос хүйстнүүдийн түүхийг бичилцсээр иржээ. Зарим оронд гутаагдан доромжлогдож, нохой мэт ад үзэгдэж ирсэн бол нөгөө заримд нь хамгийн сайхан, төгс хүн хэмээх ойлголттой өнөөг хүрчээ.

Тэд Тайландад дураараа амьдардаг

2000 онд Тайландад транс-сексиуалистүүдийг анх удаа тоолж үзэхэд 25 мянга гэсэн дүн гарчээ. Тайланд бол “Lady boys”-ийн хувьд эрх чөлөөний орон юм. Энэ нутагт тэд хамгийн эрхэмд тооцогдож хүндлүүлэх бөгөөд дээд зэрэглэлийн үнэтэй бүсгүйчүүд гэнэ. Тайландад 1998 онд “Хос хүйстэн” гоо бүсгүйн тэмцээн зохиож байснаар барахгүй тэргүүн байрын Альказар шагналтны зургийг Тайландын тэргүүн мисс эмэгтэйн зурагтай зэрэгцүүлэн сонины эхний нүүрүүдэд тавьж байжээ.

Санал асуулгаар Тай нутгийнхан хамгийн сайхан бүсгүйгээр өнөөх “Lady boy”-г сонгосон нь хачирхалтай. Зөвхөн Тайландад ч биш дэлхийн олон оронд “Lady boys”-ийг хамгаас дээгүүрт тавьдаг ажээ. Жишээлбэл Бангкок, Голландад “Beautiful Lady boy” хэмээх алдартай тэмцээн зохиогддог бөгөөд дэлхийн өнцөг булан бүрээс орон орны “гоо хөвгүүд” авьяас чадлаа уралдуулахаар цуглардаг гэнэ. Энэ тэмцээний үеэр усанд сэлэлт, элсний болейбол, олс таталтын уралдаан наадам болохоос гадна гоо бүсгүй шалгаруулах тэмцээн ч болдог. Тайландад эмэгтэйн дүрд хувилсан “эрчүүд” Бааранд дуулж бүжиглэхийн зэрэгцээ биеэ үнэлдэг аж. Зарим азтай нэг нь телевизийн алдартай шоуг хөтлөх нь ч бий. Биеэ үнэлэгч “Lady boys”-ийн тухайд гэвэл үйлчлүүлэгч нь эрэгтэй, эмэгтэй, хөгшин, залуу байх нь хамаагүй мөнгөө л төлж чадаж байвал өөрийнхөө багашигхан өрөө рүү дуртайяа хамт ордог.

Сингапур улсад “Geylang” хэмээх бүхэл бүтэн хороолол нь янхны хороолол болсон байдаг ба үүн дотор транс-сексиуалист биеэ үнэлэгчдийн гудамж байдаг гэнэ. Тэндээс хүссэн үйлчилгээг үзүүлж чадах хамгийн сайхан хүүхнүүдийг олж болдог гэнэ. Секс жуулчлалаас багагүй ашиг олдог тус оронд хэний ч гэсэн нүдийг булаасан Тайланд, Малайз, Индонезоос ирсэн “Lady boys” маш олон бий. Жирийн эмэгтэй хүнээс ялгагдамгүй, бүр тэднээс сайхан бие хаа, царай зүстэй эрчүүд секс жуулчлагчдын бас нэгэн сонирхсон зүйл нь байдаг аж.

Тэд хэлмэгдэж явжээ

Тэд ямарваа нэгэн дайн тулаан, бослогод хамгийн их өртөгсөд юм. Польшид 1910 онд гэхэд эмэгтэй хүн шиг хувцасласных нь төлөө 12 хос хүйстэнг дүүжилж байжээ. Мөн Загалмайтны аян дайны үед буруу номтон, чөтгөрийн элч хэмээн эдгээр хүмүүсийг маш олноор нь хядаж байсан тухай дурдсан байдаг. Хорвоод эр хүн болж төрчихөөд эмэгтэй болохыг хүснэ гэдэг тийм ч таатай зүйл биш болохоор л тэд үеийн үед хэлмэгдсээр, эрх нь зөрчигдсөөр иржээ. Тэднийг 1400 оны үед Ази тивд үүссэн гэж үздэг бөгөөд энэ нь гажиг бус, харин зүгээр л жороо морь, эсвэл маханд дуртай болсон тоть шиг арай өөр сонирхолтой хүмүүс гэж үздэг. Жирийн амьдралд ч гэсэн бусдаас хүч тэнхээгээр сул, өөр сонирхолтой учраас хүмүүст дээрэлхүүлэх нь их байдаг аж. Ихэнх Lady boy бага сургууль л төгссөн, эсвэл огт боловсролгүй байдаг ба энэ нь нөгөө л бусдад гадуурхагдаж, нийгмээс ангид зожиг байдагтай нь холбоотой. Даяарчлагдаж буй өнөөгийн нийгэмд тэднийг зөвөөр ойлгодог болж буй нь сайшаалтай хэрэг. Эцсийн эцэст тэд ч бас бидний нэгэн адил хүн шүү дээ.

Транс-Сексиуалистуудын холбоо

1980-аад оны сүүлээр Тайландад ийм холбоо байгуулагдсан бөгөөд одоо Ази, Европын хэд хэдэн оронд үйл ажиллагаа явуулдаг болон өргөжжээ. Мөн хүний эрхийн байгууллагаас тэднийг анхаардаг болсон нь нийгэмд эзлэх байр суурьтай болох, өөрсдийгөө хөгжүүлэхэд нь чухал нөлөө үзүүлж байна. Эр ч бус, эм ч бус гуравдагч хүйсийн хүн гэгддэг эдгээр сонин хувь заяатнуудыг хүчирхийлэлд өртөх, хүний наймаанд татагдах зэрэг эрсдэл ямагт дагаж явдаг гэнэ. Тэд өөрийн сонирхлыг мэдсэн үеэсээ эхлэн гормоны эм уудаг аж. Энэ дааврын эмчилгээний нөлөөгөөр эмэгтэй шинж чанар аажмаар мэдэгдэж эхэлдэг. Арьс, үс нь зөөлөн болж, сүүний булчирхай нь томордог. Үүний дараа биен дээрх үс нь хагдран унаж эхэлдэг гэнэ.

Асар үнэтэй бие

Гэхдээ тэд хүссэн эмэгтэйлэг төрхөө олж авахын тулд маш их зовлон туулдаг ажээ. Энэхүү өөрчлөлтийн явцад хүний бие организмд аймшигтай өөрчлөлт явагдаж, Дулмаа санааг гүнзгий стресст оруулна. Эр хүнээс хүүхэн болохыг хүссэн зарим нэг нь замынхаа дундаас няцах нь ч бий гэнэ. Хамгийн тэвчээр хатуужилтай нь л дааврын хүчтэй эмэнд хордон байж хүссэн эмэгтэйлэг биеэ олж авна. Зовлон үүгээр дуусчихдаг байсан бол бас ч яахав гэмээр, гэтэл үүний ард хамгийн хэцүү нь үлдэж байгаа. Тэд эр бэлгийн эрхтнээ 2000-5000 еврогоор тайруулна.

Дараа нь 1500-3500 еврогоор хөхөө янзлуулна. Дараагийн мэс заслуудаар өгзөгөө томруулан, хөлнийхөө хэлбэрийг өөрчилдаг аж. Хацар эрүү, хамар гээд мэс хүргээгүй хэсэг тэдний биед ховорхон үлддэг. Ингэснээр таны өмнө 10-20 мянган еврогоор асар гоёмсог хатагтай гоо сайхнаараа гялбуулан гарч ирнэ дээ.