‘Ганц худаг’-т хүчингийн хэрэг гарчээ

“Ганц худаг” дахь Цагдан хорих төвд хоригдож байсан дөрвөн хөвгүүн цуг хоригдож байсан бас нэг хөвгүүнээ хүчирхийлсэн хэрэг өнгөрсөн онд гарчээ. Хэргийг шүүх хурал энэ сард Баянзүрх дүүргийн шүүхэд болсон ч тодорхой хугацаагаар хойшлогдсон байна. Шалтгаан нь шүүгдэгч нарын өмнө нь үйлдсэн гэмт хэргийг шүүхээс эцэслэн шийдээгүй байгаатай холбоотой гэнэ. Хэрэг гарах үед хохирогч хүчингийн хэрэгт холбогдон, “Ганц худаг”-т цагдан хоригдож байжээ. Түүнийг хүчирхийлсэн хөвгүүдэд эрүүгийн хэрэг үүсгэн шалгаж эхэлсний дараа тэрээр шүүхээс дөрвөн жилийн хорих ял сонссон бөгөөд одоогоор Дархан-Уул аймаг дахь хорих ангид ял эдэлж байна. Хохирогч болон түүнийг хүчирхийлсэн хөвгүүд тухайн үед 16-17 настай байжээ.

Хөвгүүд хохирогчийг өнгөрсөн оны наймдугаар сард өдрийн цайны цагаар хорих өрөөнд байрлуулсан хяналтын камерын доор хүчирхийлсэн байна. Өөрөөр хэлбэл хэргийг хяналтын камерт өртөхгүйгээр үйлджээ. Тэд хохирогчийг ийм маягаар хэд хэдэн удаа хүчирхийлсэн аж. Хэргийг анх сэдсэн 17 настай хүү өөрийг нь анх бэлгийн харилцаанд оруулсан хүн нь “Ганц худаг”-ийн эмнэлгийн асрагч эмэгтэй байсан тухай ярьсан байна.

Зууны мэдээ