Гей залуусын миссийн тэмцээнд Гоолингоо нэрт “бүсгүй” түрүүлэн титмийн эзэн боллоо

Монголын нийгэм зуун хувь хүлээн зөвшөөрөөгүй ч “Бид байгаа шүү” гэдгээ мэдэгдэх гэж ижил хүйстэн буюу гей залуус өөрсдийнхөө хүрээд сар бүр үдэшлэг зохиож, жил бүр миссээ шалгаруулдаг уламжлалтай болоод гуравдах жилийнхээ нүүрийг үзэж байгаа.

Энэ удаагийн “Мister beauty” буюу гей мисс шалгаруулах тэмцээн “Freedom” шөнийн клубд энэ сарын 10-нд болж өнгөрлөө. Энэхүү наадам “Хамтдаа сэргийлье”, “Хөх тэнгэрийн дор бид таньтай л адилхан” уриан дор явагдаж нийт долоон залуу оролцон үндэсний, загварын болон усны хувцасны үзүүлбэр, асуулт хариулт, хувийн үзүүлбэрээрээ өрсөлдлөө.

Үндэсний хувцас болон гоёлын даашинз өмсөөд алхаж яваа нь эмэгтэй хүнээс ялгарах аргагүй. Харин хааяахан баргил хоолой гарахад нь “Эд чинь нээрээ эрэгтэй хүмүүс шүү дээ” гэж цочмоор. Энэ наадмыг “Хамтдаа” төв хамтран зохион байгууллаа. Урд жилийн арга хэмжээ нь Баянзүрх раlасе-д нижгэр болж байсан бол энэ жилийн наадам давчуухан бааранд болсноор хүрэлцэн ирэгчдийн тал нь бухимдалтайгаар буцаж харагдсан. Арай гэж багтаж орсон хүмүүс нэг ширээнд шамбааралдан, зарим нь шалан дээр сууж хүртэл үзсэн нь энэ хүрээнийхнийг сонирхогчид цөөнгүй гэдгийг батлах мэт. “Мister beauty 2009” тэмцээн эхлэхэд 2007оны мисс Уянга эзнээ хүлээж буй гоёмсог титмийг шүүгчдийн ширээнд хүндэтгэлтэйгээр заллаа. UВЗ-телевизээс зохион байгуулсан “Universe best songs 2009” наадмын ялагч болох Цэлмүүн, Тэмүжин нар энэ үдэш ирж ая дуугаа өргөлөө. Залуу уран бүтээлчид “халтуур” хийж яваа нь энэ бололтой. Ижил хүйстнүүдийн миссээ шалгаруулах тэмцээний ерөнхий шүүгчээр төрийн соёрхолт, зураач С.Саранцацралт, шүүгчээр “Залуус эрүүл мэнд төв”-ийн захирал ноён Мягмардорж, ДОХ-той тэмцэх газрын дарга Мөнхжаргал нар ажиллав.

Монголд 50 мянган ижил хүйстэн байдаг уу
Уг тэмцээнийг үзэх тасалбарын үнэ 5000 төгрөг. “Freedom” шөнийн клубд хүрэлцэн ирсэн хүмүүсийн ихэнх нь оюутан залуус байлаа. Саяхны нэгэн судалгаагаар Монголд тавин мянган ижил хүйстэн байна гэж гарчээ. Энэ нь нийт эрэгтэй хүмүүсийн долоо, эмэгтэйчүүдийн гурван хувь нь ижил хүйстэн байдаг гэсэн үг юм. Харин бидний хэлдгээр нийгмийн идэвхтэй буюу зохиож байгаа үйл ажиллагаанд байнга оролцдог 700 орчим хүн байдаг гэнэ. Тэдний дунд олны танил хүмүүс ч цөөнгүй. Олны танил нэр хүнд бүхий хүмүүс нийтийн дунд зохион байгуулагдаж байгаа үйл ажиллагаанд оролцдоггүй сэтгүүлчдэд баригдаж нэр хүндээ сэвтээчихнэ гэж айдаг сурагтай. Нэг ширээнд суугчид тамхи татаж, пиво уухгүй байгаа нэгнийгээ шоглож “энэ тал дээр онгон юм биз дээ” гэж цаашлуулах нь чихэнд содон. 20 гаран настай оюутан охин иймэрхүү үдэшлэг болж байгаа өдөр таван хайрцаг тамхи татдаг гэж ярьж байх жишээтэй.

Монголын ДОХ-ын тохиолдлын тал нь ижил хүйстнүүд
Тэмцээний оролцогч “бүсгүйчүүд”-ийн хувийн танилцуулга сонирхол татмаар. Хэдий эрэгтэй хүмүүс гэхэд хоол хийх, зураг зурах, дуулах, юм оёх хоббитой эрчүүд байв. Мөн тэдний хүсэл тэмүүлэл ч хязгааргүй. Монголоо төлөөлж дэлхийн уралдаан .тэмцээнд оролцож монголынхоо нэрийг өндөрт өргөх, монгол улсынхаа хөгжилд хувь нэмрээ оруулах хүсэлтэй эрчүүд гэнэ. Монголд бүртгэгдээд байгаа ДОХ-ын тохиолдлуудын тал хувь нь ижил хүйстнүүдийн дундаас гарсан. Нэгэн оролцогч “бүсгүй” өөрийгөө болон бусдыг ДОХ-оос хамгаалах хүсэлтэй явдаг гэдгээ хүрэлцэн ирсэн олонд хэлэв.

Энэ үгийг хэн хүнгүй бодмоор. Бүр зарим нь “Хайр чамайг ганцаардуулахгүй, газраар мөлхөхөөр тэнгэрт хөөр” гэж хэлэн үзэгчдийн сэтгэлийг хөөргөв.

“Бүсгүйчүүд” бэлгэвч, 00-ын цаасаар даашинз хийн гангарав
“Mister beauty 2009” наадмын оролцогч долоон залуу өөрсдийн зохиосон загвараараа өрсөлдсөн нь хамгийн үзүүштэй үзүүлбэрийн нэг байв. Бэлгэвчээр мөн бид бүхний өдөр тутмын хэрэглээ болсон 00-ын цаасыг ашиглан даашинз урласан байх юм. Энэ наадмын үеэр “Цэнхэр сарнай” эссе бичлэгийн уралдаан зарласан байснаа дүгнэж шилдгүүдэд шагналыг нь гардуулав. Нийт 25 бүтээл ирснээс тэргүүн байранд Амгалангийн бичсэн “Анд минь нэг л үхнэ” эссэ шалгарч, Чингүүн, Тамир нарын бичсэн “Нэгэн гайхамшгийн төгсгөл”, “Гэвч дурлана” бүтээлүүд удаалав. Мөн хүрэлцэн ирсэн хосын дунд “Хайртай юу” тэмцээнийг зохион явуулав.

Тэргүүн миссийн титмийг Гоолингоо хүртэв
Шийдвэрлэх мөч ойртох тусам хүмүүсийн дунд хэн түрүүлэх вэ гэсэн таамаглал амнаас ам дамжсаар. Үзэгчид хувийн дугаар нэг Анунгоог “Дуугий минь чи дуулаарай, дуулсан дороо ирээрэй” хэмээн ямар ч хөгжимгүй “амьдаараа” дуулахад уухайлан хашхирч байлаа. Мөн түүний биеийн харьцаа 90:60:90 гэх мэт бусдаасаа давуу тал олонтой байсанд түүнийг түрүүлнэ хэмээн шивэр авир хийж байсан.

Гэвч хүмүүсийн таамаглалаас өөр хариу гарч Гоолингоо хүндэт титэмний эзэн болов. Хоёрдугаар байрыг Валидий, гуравдугаар байрыг 4 хувийн дугаартай оролцогч Удвал эзэллээ. Тэрээр бусад миссийн тэмцээний ялагч адил сэтгэл нь хөдөлж нүдэндээ нулимстай шагналаа гардаж авлаа. Шилдэг үзүүлбэрийг хувийн дугаар гурав Амрита, энэ үдшийн хамгийн оюунлаг миссээр Удвал, шилдэг дотуур хувцасны үзүүлбэрээр Анхилууны үзүүлсэн дотуур хувцасны үзүүлбэр шалгарлаа. Хамгийн сайхан үндэсний хувцасны үзүүлбэрийг Анунгоо үзүүлж чаджээ.

Ижил хүйстнүүдийн уян налархай бүжиг хүүхнүүдийг ичээв
Тэмцээн,д оролцогчид энэ үдэш бие хаа, ухаан мөн авьяасаараа өрсөлдсөн. Оролцогч бүсгүйчүүд орчин үеийн бүжиг бүр хэрийн хүний чадахааргүй ардын бүжгийг хүртэл чадварлаг бүжиглэж чадаж байсан нь үзэгч бүсгүйчдийг ичихэд хүргэв. Тэдний хөдөлгөөн, алхаа, дуу хоолой нь үнэхээр,эмэгтэйлэг. Муухан эмэгтэйгээс дээр эмэгтэйлэг шинжтэй гэж хэлж болмоор. Оролцогч Амрита орчин үеийн бүжиг бүжиглэж энэ үдшийн хамгийн “sеху” эмэгтэй байж чадлаа. Энэ үдшийн тэргүүн мисс Гоолингоо Монгол ардын дуу “Гоолингоо” дуун дээр ардын бүжиг хийсэн юм. Дэд тэргүүн миссээр шалгарсан Валидий харин “Үүрд минийх гэж амлаач” дууг дуулав.

Монгол гей залуус гадаадынхантай хамтран амьдрах нь элбэг
Ахимаг насны хүмүүс ч энэ тэмцээнийг үзэхээр ирсэн байсан нь сонин. Гадаадын иргэд ч нэлээдгүй олон ирсэн харагдав. Монголын гей залуус гадаадын хүмүүстэй найзалж, хамтарч амьдрах нь элбэг байдаг гэдэг. Харин лесбичүүд дунд энэ нь ховор тохиолдол гэнэ. Ижил хүйстнүүдийг нэгэндээ, хайр сэтгэлдээ их үнэнч байдаг романтик хүмүүс гэж ярьдаг. Энэ үдэш цугласан олон хос дунд үсний засалт, нүдний шил, өмссөн хувцсаараа ижилссэн нь олон харагдав. Тэднийг нийгэм хүлээн зөвшөөрөхгүй байгаа ч аажмаар нийгэмд хүлээн зөвшөөрөгдөж бүр гэрлэдэг болно гэдэгт тэд итгэлтэй байдаг гэнэ.

Монголчуудын амьдрал