Монголд ”ХДВХ/ДОХ-оор 61 хүн өвчилж, ес нь нас баржээ”

УИХ-ын Тамгын газрын Хэвлэл мэдээлэл, сурталчилгааны хэлтэс, ЭМЯ, Глобаль сангийн дэмжлэгтэй ДОХ, Сүрьеэгийн төсөл, Философи, Социологи, Эрх зүйн хүрээлэнгээс хамтран Төрийн ордонд зохион байгуулсан “ХДВХ/ДОХ ба хүний эрх, хууль эрх зүй” сэдэвт сургалтад төв, орон нутгийн 30 гаруй сэтгүүлч оролцлоо. ХӨСҮТ-ийн ХМА-ны дарга Ч.Уртнасан “ХДХВ/ ДОХ-той тэмцэх, сэргийлэхэд хүний эрхийг хангах талаар төрийн бодлого, хууль эрхийн зохицуулалтыг боловсронгуй болгох нь”, ХЭҮК-ийн референт М.Цолмон “ХДХВ/ДОХ-той хүмүүсийн эрхийн олон улсын стандарт ба үндэсний хууль тогтоомж”, ЭКПАТ-ын сүлжээний ХДХВ/ДОХ-ын асуудал хариуцсан хөтөлбөрийн ажилтан Б.Ихтамир “Таны үзэг-Хүүхдийг хамгаална”, М.Одмандах Доктор, Ph.D “ХДХВ/ДОХ ба сэтгүүлчийн хариуцлага, ёс зүй” сэдвээр тус тус илтгэл тавьж сэтгүүлчдийн сонирхсон асуултад хариулав.

ХДХВ/ДОХ шинэ мянганы хүн төрөлхтнийг түгшээсэн үзэгдэл болж дэлхий нийтийн анхаарлыг татсаар байна. Монгол Улс хүн амын дундах ХДХВ/ ДОХ-ын тархалтын түвшингээрээ тархалт багатай улс орны тоонд багтдаг хэдий ч бүртгэгдсэн тохиоддол жил бүр нэмэгдсээр байгаа бөгөөд НҮБ-ын ДОХ-ын нэгдсэн хөтөлбөр, ДЭМБ хамтран гаргасан тооцооллоор 500 орчим хүн энэ вирусыг тээж явж байж болзошгүй гэжээ. Энэ нь халдвар, тархалт нэмэгдэх эрсдэл өндөр байна гэсэн үг. Манай улсад ДОХ-ын халдвар анх 1992 онд бүртгэгдсэн. Өнөөдрийн байдлаар 61 хүн энэхүү өвчнөөр өвчилсөн нь батлагдаад байгаагийн ес нь нас барсан байна. Өвчлөгсдийн 77 хувь эрэгтэй, 23 хувь эмэгтэй, 18-55 насныхан байгаа аж.

Монгол Улсын Засгийн газар НҮБ болон олон улсын бусад байгууллагын зөвлөмж, уриалгыг үндэс болгон ХДХВ/ДОХ-той холбогдсон нийгмийн нөхцөл байдал, түүний өөрчлөлтийн хандлага төвөгтэй байгааг харгалзан идэвхтэй үйл ажиллагаа явуулж, ХДХВ/ ДОХ-оос сэргийлэх үндэсний стратеги /2009-2015/, үйл ажиллагааны 2009-2010 оны төлөвлөгөө боловсруулах ажилд шуурхайлан ороод буй юм байна.

Нийслэл Таймс