Хүнийг байгаагаар нь хайрла

Сайн байцгаана уу сайт уншигчид минь. Өөрийнхөө амьдралд тохиолдсон бас ч асуудалтай байгаа гэр бүл ялангуяа бүсгүйчүүдтэйгээ тус болох болов уу гэж бодоод нэгэн зүйл хуваалцахаар шийдлээ. Эмэгтэйчүүд эрчүүдийг бодвол би яах вэ гэдэг бодол харьцангуй бага гэж би боддог. Бүсгүй хүнд үр хүүхэд нөхрөө халамжлах, гэр орноо цэвэрхэн авч явах, дээрээс нь өөрөө гоо үзэсгэлэнгээ хадгалах, мөнгө төгрөгөө зөв захиран зарцуулах гэд өч төчнөөн үүрэг ногддог. Гэхдээ бүсгүйчүүд маань энэ бүх адармаатай үүргээ гялалзтал биелүүлж амжилттай амьдарч, эр нөхрийнхөө бат ар тал болсоор л яваа. Үнэхээр бахархууштай. Яг л адилхан 8 цагийн ажил хийгээд гэртээ зэрэг орж ирвэл эхнэр хүн л ядраагүй юм шиг гал тогоо руугаа хоолоо хийхээр ордог. Амралтын өдрүүдээр амттай хоол, угаалга, гэр орондоо их цэвэрлэгээ хийх гээд л өчнөөн ажлаа бас амжуулна. За ингээд бичээд байвал бүсгүй хүний хийж байгаа ажлын тоо нэлээн болох байх. Монгол эмэгтэйчүүд маань үнэхээр хүчирхэг болохоор эр нөхрөө бас яг л хүүхэд шиг захирч, зандрах гээд байдаг тал бий. Гэхдээ бүсгүй минь тэр бол таны өрхийн тэргүүн, үр хүүхдийн чинь эцэг юм. Эмэгтэйчүүд бид эрчүүдийгээ хайраар дутаадаггүй боловч харин хүндлэл гээч зүйлээр ихээхэн дутаадаг тал бий. Хүнийг хүндлэнэ гэдэг хамгийн наад зах нь тэр хүнийг сонсоно гэсэн үг. Сонсоно гэдэг нь тэр хүний хэлж байгаа бүхэнд итгэж байна гэдгийг илэрхийлдэг зүйл.

Эхнэр хүүхэддээ хүлээн зөвшөөрөгдөж чадахгүй эр хүнийг нийгэм ч гэсэн яг л тэгж хүлээж авна. Эр хүний зүрхэнд байх итгэлийн галыг бүсгүйчүүд л асаадаг. Эр хүнд эхнэр хүний итгэлийн нүд итгэлийн үг хамгийн чухал гэж би боддог. Нийгэмд улс төрд ч бай аливаа нэгэн салбарт гялалзсан амжилт үзүүлж байгаа нэгэний ард эхнэр нь л зогсож байдаг. Ар талаа сайн авч яваа эхнэр гэдэг нэг хэрэг харин эр нөхрөө дэмжиж урамшуулж тэр хүнийг алдаа оноотой нь тэр чигт нь хайрлана гэдэг бас нэг хэрэг.

Ямар ч хүнд алдаа дутагдал байдаг. Харин хайр тэр бүхнийг далдалж уг хүнийхээ сайхан чанарыг томруулан харж алдаатай талыг нь уучилж сургадаг. Гал халуун хайр нь дүрэлзэн байх амьдралын эхэн үед энэ бүхэн үнэн байх боловч яваандаа хамаг л муу муухай бүхэн нь ил болж, арчаагүй залхуу заваанаар нь дуудаж эхлэх нь бий. Хиртэй оймсоо бөөгнүүлээд тавьсангүй, хүний нөхрүүд ийм байхад өөрийнхөө байж байгааг хар, ганц удаа яваад ирж байхад арай ч дээ… гээд л ёстой нэг хэлэх хэлэхгүй үгээр бөмбөгдөж өгнө дөө. Чойном нэгэн шүлгэндээ үгээр хүнийг үхүүлж болно шархлуулж инээлгэж уйлуулж болно гэж шүлэглэсэн байдаг. Бүсгүйчүүд минь хэлэх муу үг цээжинд үргэлж ил байдаг. Харин далдлагдаад байгаа сайхан үгээ эхлээд хэлж сурцгаая.

Би эрчүүдийг ер нь илүү хүн чанартай юм уу эсвэл жаахан муу санаатай юм уу гэж боддог юм. Мэдээж хүүхэн зантай эрчүүдийн талаар яриагүй байна. Жинхэнэ эр хүн ер нь эхнэрийнхээ тухай ямар нэгэн сэтгэл эмзэглүүлэх үг яриаг тэр бүр ярьдаггүй. Хэрвээ таны нөхөр таныг “тэдний эхнэрийг хар, тэгээд чи өөрийнхөө байж байгааг хардаа” гэж хэлвэл таны сэтгэл хэр зэрэг эмзэглэх бол? Дөнгөж хүүхдээ гаргачаад нялх бие нь тэнхэрч амжаагүй эхнэрээ “өөрийнхөө байж байгааг хардаа наад гэдэс гүзээгээ татаач” гэж хэлэх ч юм уу тантай холбоотой асуудлаар шууд ингэж ярьвал бүсгүйчүүд бид хэр зэрэг гомдох бол? Эрчүүд чинь бидэнтэй л адилхан хүн. Наанаа ямар ч харагдаж байж болно гэхдээ дотор сэтгэлдээ үнэхээр зөөлөн уяхан, ээждээ ухаангүй хайртай улс байдаг. Бидэнд нэг тогтсон ойлголт байгаад байдаг. Эрчүүд юм чинь гэж. Эр хүн уйлдаггүй гэж хэн хэлээд байгаан? Тийм л байсан юм бол эрэгтэй хүн нулимсны сүвгүй байх хэрэгтэй биз дээ? Тийм л сэтгэлгүй юм бол яаж хэн нэгнийг хайрлаад дурлаад өөр тийшээ гүйгээд байгаа юм бэ? Бүсгүйчүүд минь, өөрийнхөө нөхрийг шүүмжлэн бусдын нөхөртэй харьцуулж гомдоллон үглэж суухаа больё. Амьдрал дэндүү богинохон бас дэндүү үнэ цэнэтэй. Өөр нэгнийг хайгаад гүйж байх цаг зав танд байхгүй, бас бусдын босгож бий болгосон эр нөхрийг булаах эрх ч байхгүй. Та хэн нэгэн эр хүнийг харж жинхэнэ эр хүндээ үүн шиг нөхөртэй болохсон гэж санаж яваа бол тэр эр хүний ард жинхэнэ эмэгтэй хүн зогсдог гэдгийг нэг удаа ч атугай санаарай. Хүнийг байгаагаар нь хайрлаж байж хүн өөрчлөгддөг. Хиртэй бол хиртэй, арчаагүй бол арчаагүй, сул дорой бол сул дорой, ухаан муутай бол ухаан муутай, таны дуртай хөгжимд дургүй бол дургүй…

Ер нь ямар ч байлаа гэсэн хүнийг байгаагаар нь хайрлавал бүсгүй та өөрөө хамгийн түрүүнд аз жаргалтай болно. Тийм аз жаргалыг би ч бас мэдэрсэн. Өөрт байгаа зүйлдээ хүн сэтгэл ханаж сурдаг юм билээ. Байгаагаар нь хайрлана гэдэг нь тэр хүнийг байгаагаар нь хүлээн зөвшөөрнө гэсэн үг. Тэрний дараа л аяндаа өөрчлөлт ирж эхэлдэг.

Бүсгүй минь танд дахин хэлье. Өөрийн эр нөхрийг өрөөл бусдын эр нөхөртэй хэзээ ч битгий харьцуул. Тэд чинь нэг хэвэнд цутгагдаагүй болохоор өөр өөр л байж таараа. Хүний төрөлх ааш араншинг ялангуяа генийг нь хэзээ ч битгий шүүмжил. Тэр бүхнийг уг хүн хүсээд ч өөрчилж чадахгүй та ч зовно хажуудах чинь ч зовно. Эцсийн үр дүн нь сэтгэл хангалуун биш амьдрал.

Бас нэг зүйл нэмж хэлэхэд өөрийн гоо сайхан гадаад төрх байдалдаа дээд зэргээр анхаар. Та өөртөө туфль авчихвал маргааш идэх талхны мөнгө хомсдох гээд байгаа байж магад гэхдээ л ав. Үүнийг би нөхрийнхөө олж ирсэн бүх мөнгийг гоо сайхандаа цацаад дуусдаг ганган хүүхнүүдэд хэлээгүй шүү. Бусдын эхнэрийн хөлийг харж алхахаас өөрийн эхнэрээр бахархаж байг. Ер нь нөхөр эхнэрийнхээ хэрэглээний хэрээр сэтгэдэг юм билээ. Өөртөө санаа тавихгүй үсээ ч олигтойхон самнадаггүй эхнэрээс өөр ямар ч эмэгтэй илүү л хөөрхөн харагдана шүү дээ. Хэрвээ нөхөр чинь хардаж яагаад өөрчлөгдөөд байна гэж асуувал инээмсэглэн үнсээд чинийхээ төлөө гэж хэлээрэй. Өөрт хэрэгтэй зүйлдээ өнөө маргаашийн талхны мөнгө бодолгүй нөхөртөө итгэж даатгаад зарцуулж сур. Хайрт минь, өнөөдөр хоол хийх махгүй шүү гэж гэхдээ битгий хүний янз үз. Тэр чинь ямар мөнгө тарьдаг биш хулгай хийлтэй биш. Харин хайраа нөгөөдөр гэхэд манайх махгүй болох нь  гэж хэлвэл энэ 2 хоногт тэр хүн чинь юм бодно.

За бүсгүйчүүдээ ингээд бүгдээрээ хамтдаа эр нөхрөө босгон байгуулж урамшуулж, ялих ялихгүй алдааг нь тэвчиж хамгийн гол нь байгаагаар нь хайрлаж суръя.

Монголын гэр бүл бүхэн эв нэгдэлтэй хүчтэй байх болтугай.

секс.мн дээр ирсэн захидал