Шоовдор эрчүүд

Хүн ам зүй судлаачдын гаргасан тооцоогоор өсвөр насны хөвгүүд охидоос илүү осол гэмтэлд өртөх нь их байдаг аж. Учир нь тэд эрчүүд Зоримог, аз сорихоос буцдаггүй, юм юманд орооцолдож явдаг өсөх насны хөвгүүдийн сонирхлыг архи тамхи гээд хаалттай бүхэн татдаг. Зөвхөн энэхүү хүйсний онцлог тал нь тэдний ирээдүйд саад учруулаад зогсдоггүй багш нар, аав, ээж хүрээлэн буй орчныхон нь хөвгүүдэд охидоос илүү хатуу ханддаг. Та эмэгтэй хүүхэд багшдаа зодуулж, хэдэн цагаар сандал өргөн, эсвэл ширээн дээр эрээчсэнийхээ төлөө чихдүүлж байхыг харсан уу. Мэдээж бараг л үгүй. Хөлд орж яваа хүү, охин хоёр зэрэг ойчиход охин руугаа түрүүлж ухасхийдэг сэтгэхүй эрт үеэс бидэнд рефлекс болж удамшсан.

Охиноо уйлахад алчуур тосон энхрийлдэг атлаа Эр хүн уйлдаггүй юм. Юундаа усан нүдлээв гэж зэмлэн дуугүй болохгүй бол нэмээд гар хүрэх ч энүүхэнд. Уйлах эрхгүй хүн гэж байх уу даа? Хүүдээ хайргүйдээ биш, олон зуун жилийн туршид тогтсон энэхүү эр хүйстнийг гадуурхах үзэл өнөө үед бодит амьдралын ялгаагаар илэрч буй. Сургуулиас завсардагсдын 80 орчим хувийг хөвгүүд эзэлдэг. Бат, Туяа хоёр адилхан л хичээлээ тасалсан. Туяагийн би өвчтэй байсан багшаа гэсэн үгэнд хичээлийн эрхлэгч нь итгэсэн атлаа Батыг ийн хэлэхэд хардсаны улмаас тасалснаар бүртгэдэг. Нийтлэг ажиглагддаг энэхүү хандлагаас шалтгаалан хөвгүүд сургуулиас завсардах нь ихэсчээ. Иймэрхүү байдалд шалгалт, ямарваа урамшуулал дээр мөн л анзаарагдана. Туяа, Бат хоёул нэг хичээлийг адилхан хариулсан боловч хөөрхөн инээдэг Туяад багш нь онц дүн тавьж , харин толгойгоо үе үе илчихдэг Батад сайн гэсэн үнэлгээ өгчээ.

Дунд сургууль төгссөн дээд боловсролд дөрөөлөх шийдвэрлэх үе хаяанд ирэхэд ихэнх эцэг эхчүүд /Эр юм яавал гэж, мал дагаад үлдэг/ эсвэл / Охиноо л сургууль бараадуулъя, хүү яахав наймаа хийж, машин бариад болох л байлгүй/ гэсэн мөнөөх л гадуурхангуй нөгөө талаар өөгшүүлэнгүй үзлээр хандан шийдвэр гаргадаг нь гэм биш зүгээр л зан. Яг ийм шалтгаанаар дээд боловсрол эзэмших эрхээ хасуулсан хөвгүүд олон бий. Нэг үгээр хэлбэл тэдний эрэгтэй болж төрсөн нь насан туршийн шийтгэл гэлтэй. Охин дүүгээ сургуульд сурган, өөрөө ганзагын наймаа хийж гэр орныхондоо тусалдаг идэр насны эрчүүд олон бий. Чухам тийм ч болоод их дээд сургуулиудын оюутнуудын 84 хувь нь эрхи танхи хүүхнүүд байдаг. Манайх шиг цөөхүүлээ ард түмэнд энэ хүйсний солигдол тийм ч бахархаад байх зүйл биш. Бид ядаж дөрвөн саяулаа баймаар байх юм. Аливаа үндэстийн хүчирхэгжих гол цөм нь олуулаа байх. Гэтэл хүүхнүүд маань үрийн зулай үнэрлэнэ гээчийг мартан албаны цүнх сугавчлан ажил, сургууль хэмээн гүйцгээх болов. Нийт албан хаагчдын 78 хувь нь мөн л эмэгтэйчүүд.

Шоовдор өссөн хөвгүүдийг маань эр хүн рүү итгэлгүй хардангуй хардаг нийгэм хүлээж байна. Нэгэнт ийм байдлыг бий болгочихоод одоо тэдэн рүү муухай харах хэрэггүй.

Шоовдор эр хүн

Эмэгтэйчүүдийн эрхийг хамгаалах нийгэмлэг, Хуульч эмэгтэййчүүдийн холбоо, Ардчилсан социалист эмэгтэйчүүдийн холбоо, Либераль эмэгтэйчүүдийн холбоо, Эмэгтэйчүүдийн эмнэлэг. . . ажил дээрээ ороод ирсэн ч 90 хувь нь өнөөх л эмэгтэйчүүд, аль нэгэн албан байгууллагын хаалга татахад л эмэгтэйчүүд залхаж үхмээр юм. Эрэгтэйчүүдийн эмнэлэг гэдэг нэр тоъёонд бид арай л гэж дасаж байна.

Сонин, сэтгүүл, реклам, сурталчилгаа, ямарваа юмны билэгдэл нь мөн л эмэгтэйчүүд. Чухамдаа ийм байдлыг эрчүүд өөрсдөө бий болгосон. Тэд бүтэн зууны туршид зөвхөн бүсгүйчүүдэд зориулж загвар зохиож, зөвхөн бүсгүйчүүдийн хөргийг зурж, зөвхөн бүсгүйчүүдэд шүлгээ зориулж, зөвхөн тэдний л төлөө амьдарч, урлаж, бүтээж, авъяас чадвар, мөнгө, нэр нөлөөгөө зориулсаар ирсэн. Ямартаа л хожуу үед төрсөн эмэгтэй зураачид хүртэл өөрсдийгөө л зурдаг байхав. Эрчүүдийн өргөмжлөл, хайр сул талыг ашиглан дээш мацсан хүүхнүүд маань толгойд гармагцаа эр хүнийг ажилд авахаасаа татгалзаж, эрэгтэй хувцасны загвар зохиохоос зугтан, эрчүүдэд итгэл хүлээлгэхээс эмээн пээдийх болов.

Бусдаас шалгармал байх гэсэн байгалийн сонирхол нь давамгайлсан босс эрчүүд эр хүн эр хүндээ хайртай гэсэн үгийг мартаж, адил хүйснийхнийгээ мөн л гадуурхангуй угтдаг.

Ба т Туяа хоёрыг ажилд орохоор очиход царайлаг Туяаг илүү орорн тоо гаргаад ч болсон авсан хэрнээ Батыг гудамжинд үлдээх жишээтэй. Ингээд шоовдор эр хүний дүр бий боллоо. Сургууль төгсч боловсрол эзэмшин, алба хашиж, өөрийн гэсэн орлогтой болсон Туяад гудамжинд гологдож үлдсэн Бат арчаагүй дорой харагдаж, үүнээс улбаалан гэр бүлийн эдийн засгийн ноёрхол мөн л эмэгтэйчүүдэд шилжив. Хүүхнүүдээр буцалж, хүүхнүүдээр амьсгалсан нийгэм эр хүнийг жийж ихэмсэг бүсгүйчүүдийн тунгалаг бүрхүүлийг нэвтлэн эн тэнцүү зэрэгцэн орших боломж хаалттай энэ үед тэд маань уруудвал доройтно гэгчээр сэтгэлээр унасандаа ууж, уйлж болохгүй бүхэнтэй холбогдож эхэлдэг. Хөл дээрээ босохын тулд эрэгтэй хүн эмэгтэйчүүдээс илүү хүч, цаг хугацаа зарцуулах болсон цөвүүн цаг шүү дээ. Би чамайг тэжээж байна гэж орой бүр хашгичихынхаа оронд нөхөртөө ажил хайгаад үзээч гэж эхнэрүүдэд зөвлөе. Өөртөө ажил олсноос илүү их чармайлт гаргах боловч, та үдэш нь ядарчихсан, сэтгэлээр уначихсан ганзага хоосон ирэх бий вий.

Тиймээ эрчүүд архиддаг, зодоон цохион хийдэг, хулгай дээрэмд холбогддог гэж муучлахыг чинь сонсч байна. Хайрлуулж өссөн хүүхэд хайр дааж, хайрлаж мэддэг хүн болдог гэсэн үгийг мэдэх үү. Тэгэхээр тэднийг шоовдор хөвгүүд байх үеэс нь эхлэн өөрөөр хандах юм биш үү. Би энд хэн гахай үүрч гутал тосолж, зах дээр наймаа хийж, гэр бүлээ авч яваа талаар маргахыг хүсэхгүй байна. Учир нь шоовдор эр хүнийг сүүдэр мэт дагадаг эр хүн байж суудал тавьж өгсөнгүй, эр хүн байж . . . . . . гэсэн бүхий л дарамтуудын дороос тэднийг эхлээд өндийлгөхсөн. Учир нь бидний бэрхшээл болгон тоочдог бүхнийг зөвхөн эрчүүд үүрч гарах албатай биш, адилхан хүн гэдэг утгаараа адил тэнцүү хуваалцах ёстой.

Эр хүн гэж хэлэх бүртээ бид, эмэгтэй хүн тэднээс заавал дутаа байх ёстой гэж тунхагладаггүй гэж үү.

Шоовдор нөхөр

Би чамд хоёр хүүхэд төрүүлж өгсөн. Залуу халуун насыг минь чи үрлээ. Чиний төлөө би өөртөө байгаа бүхнийг зориулсан. Гэр бүлээ тэжээж чадахгүй юм бол яах гэж . . . . . Ял асуух мэт ийн үглэж нөхрөө залхаадаггүй эхнэр бараг л үгүй биз. Хажуу дахь ханиа нэг хардаа. Адилхан туг үс нь бууралдчихаж . Нэгэн цагт чиний дурлаж байсан залуу одоо өөрчлөгдөж, духанд нь хэдэн үрчлээс нэмэгдсэн байгаа биз, яг өөртэй чинь адил. Эмэгтэй та л гавъяатайдаа түүнд хүүхэд төрүүлж өгч, та өтлөөд байгаа хэрэг биш гэдгийг бодож үзэв үү.

“Нөхөр маань намайг зоддог. Бид гурван хүүхэдтэй “ “Тэр залуу намайг хүчирхийлэх гэж оролдсон. Дайрч доромжилсон . . . . . . ” энэ бүх гомдол юунаас үүдэлтэй юм бэ? Бүсгүй хүн ямар байна эр хүн түүнд тэгэж л ханддаг гэдэгт би хувьдаа итгэдэг. Хөнжлөөс чинь чангаасан бол та чангаалгахаар хандтай байжээ гэсэн үг.

Бид суугаад найман жил болж байна. Эхэндээ зүгээр л байдаг байсан . Сүүлийн үед зоддог, уурлаж хэрэлддэг, огцом зантай болчихлоо . . . . . . гэж уйлаад суухынхаа оронд эхэндээ зүгээр л байсан эр хүнийг тэгж өөрчлөгдөхөд нь таны цамнаж омогшдог, толгой дээр нь гарч давардаг, үглээ яншаа, эсвэл бүхнийг хайр найргүй нуруунд нь үүрүүлдэг, ядарчихсан ороод ирэхэд нь гутлаа тайл гэж угтдаг зан нөлөөлсөн тухай бодож үзэв үү. Та ханиа эвджээ. Их муухай эвдэж, хүсэл тэмүүлэл оргилсон эрч хүчийг нь ноцоосонгүй. Харин ч гэр бүлийн ялихгүй будлиан бэрхшээлийг дарамт болгон нуруунд нь үүрүүлчихэж . Тэгсэн хэрнээ энэ бүхнийхээ хариуг, арыг даасангүй . Тэр дарамт нь бухимдлаар илэрч буй нь тэр. Ханиа эр нөхөр минь гэсэн өөриймсүү сэтгэлээр бус, өнөөдрийн талх, маргаашийн өмсөх хувцас, их холдоо л нөгөөдрийн унах машин болгон харах болж. Та ханиа ёсолж авсан эхнэрийн хайр, хараар бус, аавынхаа цухал шүүмж, ах дүүсийнхээ өөнтөгч адлал, ээжийнхээ ямба, яхирлалаар харах болж. Уг нь тэр тэдэнтэй биш тантай л амьдрал холбосон. Ихэнх эхнэрүүд нөхрийгөө гараад явахад, хүүхдүүддээ аав чинь . . ., гэхчлэн ярих ярихгүйг дэлгэн ялааг ямаа, ямааг тэмээ болгон өөчилж муулдаг бол, нөхрүүд харинч эсрэгээр ээжийгээ хайрлаж байгаарай. Ирэхэд нь цай чаначихгүй яагаав хэмээн нууцхан халамжилдаг гэсэн сонирхолтой дүгнэлтийг францын гэр бүл судлаачид гаргасан тухай дурдъя.

Бид сайхан эрчүүдийг мэднэ. Хүчирхэг бахархмаар эцэг хүнийг, удирдагчдыг мэднэ. Тэдний ард сайхан эмэгтэйчүүд, жинхэнэ бүсгүй ертөнц байдаг юм. Сайхан эмэгтэйчүүд сайхан эрчүүдийг бий болгож төлөвшүүлдэг. Тэгэхээр та эр хүнийг гоочилж суухын оронд эхлээд өөрийгөө нөлөөгүй толинд нэг сайн хараатахвал яасан юм бэ? Жинхэнэ эр хүн ховор болжээ хэмээн шогшрох гэж бүү яар. Жинхэнэ эмэгтэй хүн ховордож, хүүхнүүд маань бүсгүйлэг чанараа гээж байгаа учраас жинхэнэ эрчүүд ховордож буй юм биш үү гэж логик утгаар нь эргүүлээд асууя. Хамгийн гол нь тэднийг байгаагаар нь хүлээж авах. Тэр тантай л адилхан арван хуруу тэгш дутагдалгүй амьтан биш.

секс.мн дээр ирсэн захидал