I will always love you

Яг одоо “I will always love you” гэдэг дууны төгөлдөр хуурын хувилбарыг сонсоод л сууж байна. Уйтгартай байна аа, дагаад аялахаар уйлчих гээд л. Зүрх минь хэдийний цохилохоо байчихсан мэт, ямар нэгэн зүйлээр, магадгүй хэн нэгнээр ангаж цангаад байгаа ч юм уу. Тийм дээ цангаж байгаа, хайраар цангаж байгаа, чамаар дутаад байна. Цээжний минь зүүн хэсэг хөндий, хоосон, харанхуй оргиод байна. Чи нээрээ зүрхийг минь аваад явчихсан юм уу? Хааяа хааяа ийм уйтай шөнүүд ирэх юм аа. 

Маргааш магад чамтай таарах байх аа, гэхдээ би чамтай юу ч дуугарахгүй ээ, магадгүй хараагүй хүн болж жүжиглэж ч болох юм. Гэхдээ л дотроо хичнээн их хайрладгийг минь, хичнээн их уйтгарлаж, шаналж байгааг минь чиний зүрх бас мэдрэх биз ээ. Тийм болохоор би юу ч дуугарахгүй ээ. Маргааш чамайг тэмцээн сонирхохоор ирнэ гэж бодохгүй байна аа, зүгээр л намайг харах гэж ирэх байх, би ч гэсэн сайн тоглож чадахгүй байж, зөвхөн чамд харагдах гэж л энэ тэмцээнд орж байгааг чи мэдэх үү?

Магадгүй яг одоо чи бас намайг бодоод л орондоо хэвтэж байгаа байх, уйлж байж ч болох юм. Яагаад гэвэл чамайг гуниглахад миний зүрх бас гунигладаг, чамайг уйтгарлахад би бас уйтгарладаг гэдгээ хоюулаа зөндөө олон удаагийн туршилтаар нотолчихсон шүү дээ. Яг одоо би уйтгарлаад байгаа болохоор чи минь мэдэрч л байгаа, эсвэл чи уйтгарлаад байгаа болохоор би уйтгарлаад байгаа ч юм уу? Чамтай учрахаас өмнө хайр гэдэг зүйл хүмүүсийг сэтгэлийн ийм далд холбоогоор холбочихдог гэдгийг би мэддэггүй байжээ. Магад үүнийг мэддэг хүмүүс энэ дэлхий дээр цөөхөн ч биз. Жинхэнэ сайхан хайртайгаа учирсан, бие биенээ олсон хүмүүс л үүнийг мэддэг байх. Харин чи бид хоёр тэр азтай хүмүүсийн нэг гэдгээ мэдэх үү?

Гэхдээ бас азгүй, яагаад гэвэл чи бид хоёр яг одоо хамт байж чадахгүй л байна шүү дээ. Чамдаа хайртай гэж хэлэлгүй хичнээн удсан юм бэ? Хайртай гэхийг чинь сонсолгүй бас хичнээн удчихсан юм бэ? Хамгийн сүүлд хайртай гэхэд чинь би “Яагаад надад хайртай гэж хэлдэг юм бэ?” гэж асуусныг минь санаж байна уу? Чи тэгэхэд их эмзэглэсэн, “Хайртай болохоороо л хайртай гэж хэлдэг” гэсэн. Тийм ээ, надад хайртайд чинь огт эргэлзэж байгаагүй. Гэхдээ миний асуулт бол “Надад хайртай юм байж яагаад хажууд минь байдаггүй юм бэ?” гэсэн утгатай байсан. Түүнээс хойш чи надад хайртай гэж хэлэхээ больчихсон. Намайг уучлаарай. Хайртай гэж хэлэх эрхийг чинь тэнэг асуултаараа хаачихсанд. Хайртай гэдэг үгийг чамд хэлэхийг хичнээн их хүсдэгээ би мэднэ ээ. Бүр хэлээд л баймаар, гэхдээ хэлэхээсээ хэд дахин илүүтэйгээр чамаас энэ үгийг сонсохыг хүсдэг юм шүү. Чи ч бас адилхан тийм үү?

Одоо би чамтай хамт байсан мөчүүдээ, ярьж байсан яриануудаа, дурсамжуудаа нэг нэгээр нь эргүүлээд л, дахин дахин санаад л, дурсаад л сууж байна. Санаж байна уу? Өмнөх тэмцээн дээр чи талбайд, харин би үзэгчийн суудалд байсан. Тэмцээний дараа “Чи намайг ерөөсөө харахгүй, өөр охин хараад инээгээд байсан. Бас юу ч хэлэлгүй яваад өгсөн, муухай” гэж тунирхсанаа санаж байна уу? Яг тэр тунирхах үед чинь эгдүү минь хичнээн их хүрсэн гээч? Тэврээд авмаар л санагдсан. Гэхдээ тэврээгүй ээ, намайг уучлаарай. Бас “Чиний хайрыг татсан болохоор би азтай” гэж хэлэхэд чинь инээмсэглээд л өнгөрсөн. Уул нь бол чамаас илүү би азтай шүү дээ. Чиний хайрыг булаасан болохоор, чамайг олж хайрласан болохоор би чамаас илүү азтай. Тэр азыг чи минь л надад өгсөн.

Эргээд харахад энэ богинохон хугацаанд чи бид хоёр олон сайхан дурсамжийг хамтдаа бүтээчихжээ. Хэрэв дахиад жаахан хамт байсан бол, хамт байх боломж байсан бол хичнээн сайхан бэ? Их гомдсон шүү,  хамт байж болохгүй гэхэд чинь. Гэхдээ зүгээр дээ. Найз нь уучилна аа, хайртай болохоор дандаа л уучилдаг. Хэдийгээр чи энэ бичсэнийг минь уншихгүй ч гэсэн цээжинд хуримтлагдсан бүхнээ ямар нэг аргаар гадагшлуулахгүй бол дэлбэрчих гээд байсан юм аа. Харин жаахан биччихсэн чинь тайвширчих шиг боллоо.

Бас хайртай болохоороо тавиад нисгэе шувуухайгаа. Үнэхээр минийх бол эргээд наддаа хүрээд ирнэ байх аа гэж хүлээе. Харин тэгээд эргээд ирвэл дахиад хэзээ ч тавихгүй шүү. Энэ дууг хичнээн ч удаа сонсчихов доо? Гэхдээ яг одоо энэ дуунд өгүүлдэг шиг би чинь чамайгаа үргэлж хайрлах юм шиг л санагдаад байна. Сайхан амраарай, унтах гэж байхад чинь зүрхийг чинь жаахан хямраасан бол бас уучлаарай 🙂