Эр хүн /2/

“Эр хүн” нийтлэл болон түүний дор бичсэн сэтгэгдлүүдийг уншаад гэр бүлийн талаарх өөрийн саналаа бодлоо хуваалцахыг хүслээ. Хүн бүр л анх гэр бүл болохдоо аз жаргалтай сайн сайхан амьдрана гэж итгэж найдаж байдаг. Гэтэл ихэнхи хүмүүсийн хувьд ялангуяа энэ сайтад зовлон жаргалаа бичиж байгаа хүмүүсийн “аз жаргал” хаашаа нисэн одов оо? Үнэндээ хаа нэгтээ нисэн одов уу, эсвэл өөрсдийнхөө гараар үгүй хийчихэв үү?

Тэгэхлээр ханиа хэрхэн сонгосноос таны амьдрал аз жаргалтай байх эсэх нь тодорхой хэмжээгээр хамаардаг гэдгийг бүгд хүлээн зөвшөөрөх байх. Амьдралын ханиа сонгохуйн хамгийн гол нууц нь гэр бүл болох учир шалтгаан, гэр бүлийнхээ хүнээс чухам юуг хүсэн хүлээж байна вэ гэдэгт оршдог. Учир шалтгаан гэдэг нь “хайр” байж болох ч таныг хайрлах хайр, та түүнийгээ хайрлах хайр тань ямар түвшинд байгааг хэлж байна гэсэн үг. Энэ л учир шалтгаанаас хамаарч хосуудын хооронд зохицон нийцэх харьцааны тодорхой хэлбэр бий болдог.

Өнөө цагт ихэвчлэн доод түвшний буюу бэлгийн дур сонирхол дээр үндэслэсэн “хайр, дурлал”-аар гэр бүл болох нь элбэг байна. Мэдээж бэлгийн амьдрал бол аль ч түвшний гэр бүлд чухал үүрэгтэй боловч зөвхөн түүнд үндэслэн гэр бүл зохиох нь олон эрсдэлийг дагуулдаг. Бэлгийн дур хүсэлдээ тулгуурлан гэр бүл болсон хосууд аажимдаа тэдний хооронд ижил төстэй, нийтлэг зүйл байхгүй гэдгээ мэдэрч эхэлдэг. Ийм хосууд ихэнхидээ гэр бүл болохоосоо өмнө 2 тийш болдог боловч, аль нэгэн нь нөгөөгийнхөө хойноос хөөцөлдсөөр л байдаг. Магадгүй өөрийн гэр бүлтэй болсон хойноо ч гэсэн. Хэрэв ийм хосууд гэр бүл болсон бол хэсэг хугацааны дараа аз жаргалгүй болж эхэлдэг. Учир нь нэг нь нэг зүйлд татагдаж байхад нөгөө нь өөр зүйлийг сонирхож байдаг.

Ийм гэр бүлийн өдөөгч нь заримдаа эмэгтэй хүн өөрөө байдаг. Бүсгүй ганцаардмал байдлаасаа ангижрахын тулд бэлгийн дур хүсэлдээ хөтлөгдөн өөрт нь татагдаад байгаа залууг “ашигладаг”. Эмэгтэй хүн байгалиасаа ганцаараа байхыг хүсддэггүй мөн чанартай бөгөөд эцэстээ хүнтэй сууж гэр бүлийн амьдралаар амьдрах гэсэн далд хүсэл байнга байдаг. Чөлөөтэй зугаалж цэнгэх эсвэл ганцаараа амьдрахаас залхсан, олон эрчүүдтэй харьцаатай байсан болон бэлгийн харьцаанд онцгой ач холбогдол өгөхөө больсон эмэгтэйчүүдэд иймэрхүү зүйл байнга тохиолддог.

Дараагийн учир шалтгаан бол тодорхой сонирхол дээр үндэслэсэн гэр бүл юм. Хосууд биеийн тамир, бүжиг, аялал жуучлал зэрэг адил сонирхолтой байдаг. Магадгүй ажил, мэргэжлээрээ ч ижил байж болно. Ийм хосууд хаана амьдрах, ажиллах болон өөр бусад зүйлсийн тухай санаа бодлоо хэлэлцэх эсвэл амьдралын тухай үзэл бодолтой нь холбооотой асуудал гарч ирэх хүртэл харьцаа нь тогтвортой байдаг. Тодорхой учир шалтгаанаар гэр бүл болсон хосууд эсрэг хүйстнийхээ тусламж дэмжлэгтэйгээр өөрийн хүсэл эрмэлзлийг гүйцэлдүүлж чадна гэж найддаг боловч хүсэн хүлээж байсан нь биелэхгүй болохоор урам нь хугардаг. Ойр дотны хүнээ аашилж загнаж байгаад хүмүүжүүлчихнэ гэж хүмүүс үнэхээр итгэж байдаг ч тэрээр өчүүхэн төдий ч өөрчлөгддөггүй болохоор тэд үргэл толгойгоороо мөс мөргөж байдаг. Амьдралын туршид ямар ч өөрчлөлт гардаггүй бөгөөд цаг хугацаа явсаар тэд урам хугаран итгэл алдардаг. Тэд гэр бүл болсон шалтгаандаа уягдан бие биедээ хамаагүй харь хүмүүс шиг амьдардаг.

Хос хоёрын харьцаа амьдралын хэв маяг, идэвхи, сэтгэл хөдлөл дээр суурилсан байж болно. Зарим хосуудын хувьд хамтдаа байхдаа хөгжилтэй, баяр баясгалантай байдаг тул хүндрэл бэрхшээлийн эсрэг хамтдаа тэмцдэг. Ийм хосуудын хувьд ухааны түвшний таарамж нийцэл байдаггүй учраас гол асуудал тэр тусмаа нарийн зүйлийн талаар зөвшилцөх, хэлэлцэхэд хүндрэлтэй байдаг. Энэ төрлийн хосуудад ашиг завшаан хайж дурлагсад бас ордог. Бүсгүй өөрийнхөө дэргэдэх “баян, чинээлэг” эрд татагдан дурладаг. Эсвэл нийгэмд тодорхой байр суурьтай болохыг хүссэн хүмүүсийн харилцаа ч энэ төрөлд орж болно. Ийм хүмүүс бие биенээсээ авах юмаа авч удаан хугацааны туршид хамт амьдарч болдог. Гэхдээ тэдний харьцаа өнгөцхөн байдаг. Ийм гэр бүлийн хосууд бие биенээ гүн гүнзгий хайрладаггүй.

Залуу эр хүн хүмүүжил сайтай, өөртэй нь болон өөрийн төрөл төрөгсөдтэй зөв харьцдаг бүсгүйг хүсэж байдаг. Ийм эмэгтэй нь мөн үүнтэй адил шинжтэй залуу эрчүүдийг өөртөө хүчтэй татдаг. Ийм хосуудын зохицол нь зүрхний түвшинд байдаг бөгөөд тэд нийгэмд биеэ зөв авч явах, амьдралын дүрэм, журам болоод зарчмуудыг баримталж, эцэг, эхдээ хүндэтгэлтэй байдаг. Гэхдээ өөрийгөө ухаархуйн тал дээр таарч нийцэхгүй зүйл тэдэнд байж болно. Эр нөхөр нь эхнэрийнхээ дотоод шаардлагад нийцэж байвал байвал (эхнэрийнхэн шаардлага шүү!) тийм эмэгтэй эр нөхрийнхөө үгийг дуулгавартай сонсож, түүнийг хүндэтгэдэг. Ийм л гэр бүл аз жаргалтай байдаг. Харин эр нөхрийн үзэл бодол эхнэрийнхэн шаардлагад нийцэхгүй байвал тэр эмэгтэйн урам хугардаг бөгөөд амьдралын тухай эр нөхрийн үзэл бодолд гүн автан ордоггүй. Эндээс эмэгтэй хүн гэдэг гэр бүлд ямар хүчтэй нөлөө үзүүлдэгийг харж болно. Эмэгтэй хүн сэтгэл ханамжгүй, таагүй байдалтай болсон байх аваас тэр гэр бүлийнхэн бүгдээрээ сэтгэлийн таагүй байдалд ордог. Харин эмэгтэй хүн сэтгэл ханамжтай байвал бусад нь бүгдээрээ л таатай сайхан байдаг. Ажил дээр ч гэсэн атаа жөтөө, хов жив хөөцөлдсөн бүсгүйчүүд олонтой хамт олон таагүй байдаг бол эвсэг хамт олныг хэдхэн бүсгүй бий болгож чаддаг.

Аз жаргалтай гэр бүлийн үндэс нь эр хүн хариуцлагатай байхад оршдог. Эхнэр нь өөрийг нь сонсох дур сонирхолтой, санаа бодлыг нь анхааралдаа авдаг хийгээд бүх талаар өөрт нь тусалдаг тийм л нөхцөлд эр нөхөр нь эхнэрийнхээ төлөө хариуцлагыг бүрэн хүлээн авдаг. Харин эхнэр нь үл хамаарсан байх дур сонирхолтой, өөрт нь тусалдаггүй, дэмждэггүй байвал эр хүн хариуцлалыг өөр дээрээ авах чадваргүй байдаг. Эр хүний мөн чанар байгалиасаа ийм л байдаг. Гэр бүлийн дотор бүрэлдэн тогтох харилцаануудыг эмэгтэй хүн л албадаж байдаг. Учир нь эрэгтэй хүн бол динамик буюу хөдөлгөөнтэй энергийг агуулж байдаг бол эмэгтэй хүн статик буюу тогтонги энергийг агуулж байдаг. Эмэгтэй хүн хэзээ л эр нөхрөө хангалттай нухацтай, зохистой хүн биш, надад аз тохиосонгүй гэж үзэж эхлэнэ тэр цагаас эхлээд таны аз жаргал зугтан одож эхлэх болно. Үүний уршгаар гэр бүл аажмаар нуран унаж эхэлдэг.

Ганбаа