Хайр сэтгэл зүрх сэтгэлд л оршдог

Сайн байна уу. Та бүхэнд энэ өдрийн мэнд хүргье. Би өөрийн хайр сэтгэлийн талаар хуваалцахыг хүссэн юм. Би бусдын харахаар байдаг л нэгэн бүсгүй. Нүдэндээ бага зэргийн гуниг тээсэн ч сэтгэлдээ гал шатааж яваа нэгэн. Бусдаас илүү гарах сайхан царай зүстэй нь биш ч бас тийм ч яадгаа алдсан нь биш. Байдаг л нэгэн дундаж нэгэн бүсгүй.

Гэхдээ би бусдаас нэг талаараа арай л өөр. Учир нь би эр хүнийг биш эм хүнийг хайрладаг. Энэ бол надад байх хамгийн том нууц бас бусдаас ялгарах зүйл минь.

Учир нь хэн ч намайг тэр бүү хэл хамгийн сайн найз минь ч намайг ийм гэж мэдэхгүй. эдэгдэхийг ч хүсдэггүй.

Дунд сургуульд байхдаа нэгэн найз охиндоо анх сайн болж билээ. Тухайн үед ангийн хүүхдүүд нэг л хүүхдээрээ бүгд хөөцөлдөж гүйцгээж байхад миний шилжилтийн нас арай л түрүүлж эхэлсэн үү сайн мэдэхгүй л юм. Цээж минь хөндүүрлэх мэт байсан. Анхандаа юм гарсан юм болов уу гэж бодсон ч биш байлаа. Хөх минь ургаж эхэлсэн юм. 11хэн настай би надад тохиолдох биеийн өөрчлөлтүүдээс анхандаа их л айж ичдэг байлаа. Хөхөө нуух гэж хоёр мөрөө байдгаар нь урагшлуулж өндөр туранхай би ч элдэв хочтой л байлаа. Сарын тэмдэг бол ярих ч юм биш ахтай хүн болохоор хандах хүнгүй буруу юм болоод байгаа юм шиг л ичдэг байлаа. Өнөдөр биетэй болохоороо хөвгүүддээ үзэлцэнэ шүү. Найз охидууд гомдоож ичээхэд нь очоод л түлхээд алгадаад авна. Биеийн өөрчлөлтүүдээ нийлдэг охидууддаа ч хэлэхээс ичдэг байлаа.

7 дугаар ангид байхад маань ангийн охидуудад минийх шиг өөрчлөлт орж эхлэхэд мэдэхгүй юм шиг өнгөрдөг байж билээ.

Охидууд маань биеэ авч явах байдал хөвгүүдээс шал өөр. Ямар ч асуудлыг нууж чаддаг гайхалтай авьяастай. Хөвгүүд анх захиа өгч гүйлдэцгээхэд манай охидууд нийлээд уншиж шоолцгоодог байж билээ.

Ганцэцэг гэх миний найз охин бусад охидоос их л даруухан хов живд оролцохгүй хөдөлгөөн цөө бие султай ч юм шиг. Бид сайн найзууд биш ч бас огт харилцахгүй биш.

Нэг л өдөр тэр даруухан охин ядруухан айлын тиймхэн хувцасладаг охин шал өөр хувцас өмсөж сургуульд ирэхэд ангийнхан бүгд л пүү паа гэж шоолох нь шоолж, атаархах нь атаархаж эхлэв. Царай нь тодорсон тэр охин яагаад ч юм бэ бусдын хайрыг татаж эхлэв. Хөвгүүд ч түүнтэй харилцах нь өөр болж захиа өгөх нь ихсэв.

Гэтэл нэг сонин юм нь би бусдаас илүүтэйгээр түүнд татагдаж эхлэв. Анх хөвгүүдийн сонирхолыг татахад нь юм бодоогүй ч нэг л мэдэхэд надад улам л хөөрхөн харагдах болов. Бид улам дотно найзууд болж номын санд сууж хичээлээ хамт хийх болов. Түүнтэй ярилцах хамт байх маш сайхан байлаа. Яагаад ч юм мэдэлгүй гэртээ байхдаа хүртэл Ганааг боддог болчихов. Надад тохиолдсон асуудал бүрт Ганаа байсан бол яах байсан бол гээд л. Учир нь тэр их ухаалаг бас юмны учрыг олохдоо гаргуун байж билээ.

9дүгээр ангид байхад минь манай ангийн нэгэн хөвгүүн хацар дээр минь үнсээд гүйгээд алга болов. Сонин ч юм шиг, инээдтэй ч юм шиг, ичмээр ч юм шиг. Ангийнхан бүгд Батаа гэх тэр хөвгүүнтэй намайг холбож шоолцгооно. Гэхдээ надад Батаагийн үнсэлтээс илүү Ганааг үнсэхийг хүсэх сэтгэл их байсан юм. Ганаатай хөтлөлцөөд алхах, юм яриад инээлдэх ямар сайхан байдаг байсан гээч. Энэ үед би нэг л биш байгаагаа олж мэдсэн юм. Би хөвгүүдэд биш охидод тэр тусмаа Ганаад сайн байгаад байгаагаа мэдэрч эхлэв. Энэ бодол минь намайг бусдаас тусгаарлаж, ичиж биеэ барих байдлыг минь улам нэмэгдүүлж байв. Сахилгагүй Батаагаас гадна хэд хэдэн хөвгүүдээс захиа авлаа. Сайхан санагддаг байсан ч Ганааг бодох бодлыг минь нэг нь өөрчилсөнгүй. Сагс хамт тоглож, теннис хамт тоглож, хичээлээ хамт давтсан ч уйддаггүй байлаа.

Энэ бүх сонин мэдрэмж минь Ганааг үнсэж үзмээр санагдах болов. Бид тухайн үед нүүрэндээ будаг түрхсэн охидыг халтар царайгаа дарлаа гэж ярьцгаадаг байлаа. Гэсэн ч хүссэн хүсээгүй уруул өнгөлөгч өө даагч хэрэглэхээс өөр аргагүй нөхцөлд байсан юм. Ээжээс ийм тийм юм аваад өг гэхээс илүү нууцаар будгийн савыг нь ухах нь элбэг байлаа. Харин Ганаа бол өөр уруул өнгөлөгч ч хэрэглэхгүй. Байгаагаараа л хаөрөн охин байв. Тэр маань бага зэрэг сэвхтэйгээс өөр ямар ч асуудалгүй. Сэвхнээсээ их ичнэ ээ. Гэтэл надад тэр хөөрхөн хэдэн цэг нь юунаас ч илүү таалагддаг байж билээ. Ахлах ангид орох үед бүгд л найз бандитай болцгоож хосууд болцгоож байлаа. Ганаа надаас илүү манай ангийн Долгион гэх охинтой дотно найзлана. Гэхдээ л надруу харах тэр гайхалтай харц нь надад ямар их сайхан байдаг байв.

Бид тийм дотно биш ч муугүй сайн найзууд учир олон зүйл дээр байнга таарна. Заал авах, номын санд суухад байнга л хамт байдаг байсан.

Хөвгүүдээс ирэх захидал, бүр надаар дамжуулж Ганаад өгөхийг хүссэн олон захидал бүрд би нууцхан харамладаг байв. Нэг л мэдэхэд би түүнд ухаангүй дурласан болохоо мэдрэв. Даанч энэ мэдрэмж нэг л биш. Заримдаа уур хүрмээр, галзуурмаар ч яав ч дарж дийлээгүй юм.

Бид сайн найзууд болсон ч хэлэхээс ч айж байлаа. Энэ сонин мэдрэмжээ дарж, нууж ядан хичээнэ.

Нэг л мэдэхэд бид сургуулиа төгсөх болцгоолоо. Гэтэл Ганаа маань гадаадад сурахаар болжээ. Энэ мэдээ надад яасан их гунигтай, түүнд маань яасан их баяртай байсан бол. Тэр маань баяр баясалтай инээж хөөрч байхад, би түүнийг алдаж байгаа мэт гуниж, түүнийгээ арай гэж нууж байлаа.

Оюутан боллоо. 4 жил хурдан өнгөрсөн юм. Энэ хугацаанд би намайг гэсэн хөвгүүдтэй харилцахгүй тэнэг мэт явсаар өнгөрөөлөө. Нэг ажилд орж уйтгартай өдөр хоногийг өнгөрөөж байтал Ганаа ирсэн тухай ангийн нөхдөөс чимээ сонслоо. Бушуухан уулзахын хүслэн болсон би ямар их өөрчлөгдөж, ямар лхөөрхөн болсон болдоо, намайг санадаг болов уу юу гэж боддог бол гээд л олон бодол тллгойгоор дүүрэн.

Дунд сургуулийн төгсөлтийн ойн уулзалтад таарсан миний харц түүнээс бараг л салсангүй. Даанч тэр маань нөхөртэй болж, хүүхэд төрүүлсэн байлаа.

Би чамд хайртай гэж хэлэхийг би бараг мянган жил хүлээж, уруул дээр нь зөөлхөн үнсэхийг ямар их хүлээсэн гээч. Даанч тэр минь над шиг хүн биш байж. Тэр ч бүү хэл ижил хүйстнүүдийн талаар ярих эвгүй яриаг түүний амнаас сонсож амжлаа.

Амьдралдаа таарсан эрчүүдийг би үзэн яддаггүй ээ. Гэхдээ түүний хэлсэн үг зүрх зүсэх мэт л байлаа. Гэвч би түүнийг харахаар л бүх л бодол минь цэлмэсэн хэвээр. Хайр татсан хэвээр л байх юм.

Одоо би нэгэнт 30 гарсан ч ган бие хэвээр. Эрчүүд бол залгаж, янз бүр болоод л. Татаж чангаацгаагаад нэг бодох нь хөгжилтэй ч нэг бодлын ядаргаатай. Ямар ч сайхан залуу байсан Ганаа шиг минь сэтгэл татахгүй нь харамсалтай. Эр хүнтэй бэлгийн харилцаанд хэд хэд орж үзсэн ч хэзээ ч таашаал авч үзээгүй.

Би яалт ч үгүй эмэгтэй хүнийг үнсэхийг хүсдэг минь үнэн. Тэдний тэр ихэмсэг, байгаа байдал нь, эмзэг зөөлөн, мэдрэмтгий, уяхан, зөөлөн, даруухан, булбарай арь энэ бүгд эрчүүдэд даанч байдаггүй. Би эрчүүдийг үзэн яддаггүй. Хүндэлдэг гэхдээ л би тэдэнтэй гэр бүл болж амидарч чадахгүй. Огт сайхан биш миний хувьд.

Гэхдээ би Ганаагаа сэтгэлээсээ тавьж явуулсан юм. Одоо би ээж ааваасаа, найз нөхдөөсөө нөхөр хүүхэд нэхүүлсэн нэгэн болж хувирсан. Даанч хэн нь ч намайг ийм асуудалтайг мэдэхгүй л яваа. Бараг бүгд л нэг хүн байна танилцаад үзээч, хүн хартай болооч, хүүхэд оройтлоо гээд л. Энэ бүгдээс залхаж байна. Би өөрийнхөөрөө амьдармаар байна

Өөрийнхөөрөө хайр дурлалыг мэдэрч, өөрийнхөө шийдвэрийг хүндэлж явахыг хүсч байна. Дэндүү их юм бичихыг хүссэн ч одоо бас л ихэдсэн бололтой.

Хайр сэтгэл минь миний зүрхэнд л оршдог юм. Тийм ээ би чамд хайртай энхрийхэн минь. Хэлж чадаагүйд минь, зориг гаргаж чадаагүйд минь уучил.