Бэлгийн сулрал

Эрэгтэй хүний хэвийн бэлгийн үйл ажиллагааны хямралыг бэлгийн сулрал гэнэ. Судалгаанаас үзэхэд эрдэмтэн Ю.И Кушнирук, А.П Шербаков нарын судалгаагаар эрүүл гэж тооцогдох гэр бүлийн 60.3 хувь нь бэлгийн харилцааны ямар нэг бэрхшээлтэй байсны 40.5 нь бүр анх гэрлэх үеэсээ 19.8 хувь ямар нэг хожуу тохиолдсон шалтгаанаас болсон байжээ. Тэдгээр гэр бүлийн 46.2 хувь нь эмч, мэргэжилтний буюу өөрсдийн хүчээр уг байдлыг давж чадсан бол 14.2 хувь нь гэр бүл салахад хүрсэн байна.

Бэлгийн сулралын тухайд сэтгэцийн нөлөөт бэлгийн сулрал 25 хувийг эзэлдэг бол бие махбодь эрхтэн системийн органик өөрчлөлтөөс болсон тохиолдол 25, холимог ангиллынх нь 50 хувийг эзэлж байна. Сэтгэцийн нөлөөт бэлгийн сулрал анхдагч буюу тогтмол байх, хоёрдогч буюу үе үе илрэх зэрэг шалтгаантай бол бие махбодь эрхтэн системийн органик өөрчлөлтөөс болсон тохиолдолд нөхөн үржихүйн эрхтний өөрчлөлт (түрүү булчирхай ба төмсөг дайврын үрэвсэл гэх мэт), нуруу аарцаг ясны гэмтлийн үед мэдрэлжүүлэлт цусан хангамж алдагдах, хорт зуршил (архи, тамхи, мансууруулах бодис) зэрэг шалтгаантай байна.

Бэлгийн сулралын үед бэлэг эрхтний хөвчрөлтийн гажиг, үрийн шингэн гадагшлуулах үйл ажиллагааны буюу дур тавилтын өөрчлөлт, бэлгийн дур хүсэл буурах, аарцгийн хөндийн болоод нөхөн үржихүйн эрхтний гэмтэл, мэс засал зэрэг шинж тэмдгээр илэрнэ.

Сэтгэцийн нөлөөт шалтгаанд сэтгэл мэдрэлийн өвчин, бэлгийн гаж дон, сэтгэлийн дарамт цочрол, мэдрэлийн сульдаа болно. Харин эрхтэн системийн өвчлөл өөрчлөлтөд судасны эмгэг, судас хатуурах, нарийсах 40, чихрийн шижин 30, эмийн нөлөө-нэг эм удаан хугацаагаар уух 15, мэдрэлийн өвчин 10, аарцаг, эрхтний мэс засал ба гэмтэл 8, дотоод шүүрлийн булчирхайн үйл ажиллагаа алдагдах 3, бусад 1 хувиар алдагдана. Холимог шалтгаант бэлгийн сулрал нь бие махбодийн өөрчлөлтөөс болж бэлгийн сулралд ороод түүндээ санаа зовж, сэтгэл тавгүй болсноор давхар сэтгэцийн нөлөө үүснэ. Үүнд бэлгийн амьдралд хамтраг оролцогчийн зүгээс үзүүлэх хандлага их нөлөөтэй.

Оношийг үнэн зөв, бүрэн тогтоосны үндсэн дээр өөрөөр хэлбэл, бэлгийн сулралын шалтгааныг тодорхой болгоод эмийн, мэс заслын болон сэтгэлзүйн аргуудаас оновчтойг нь сонгон авч тохируулан эмчилснээр үр дүнд хүрэх боломж бүрдэнэ. Энэ бол зөвхөн нарийн мэргэжлийн эмч нарын маш нарийнь өндөр хяналтад хийгдэх ажил юм. Гэтэл ихэнх хүмүүс хэд хэдэн үндсэн алдаануудыг гаргаснаар уг эмгэгээ эмчлэх гэж ямар ч үр дүнгүй оролдлого хийдэг.

Тухайлбал, бусдыг дуурайн, хэн нэгний амаар эмчлэх гэж оролдох, энэ талаар тодорхой мэдлэг муутай мэргэжлийн бус эмч нарын зөвлөснөөр оновчтой бус эмчилгээ хийлгэх, түр зуурын нэг удаагийн үйлчилгээтэй эм хэрэглэх зэрэг оролдого хийх хэрэггүй юм. Учир нь дээр дурьдсан бүхэн үндсэн шалтгааныг арилгаж чадахгүй, харьцангуй залуу хүмүүс бэлгийн дааврын (гормон) шинжилгээгүйгээр, даавар дур мэдэн эрт хэрэглэх нь алсдаа байдлыг улам муутгадаг гэдгийг сануулж байна.