Эрчүүдийн дурлалын 7 үе шат. Яг л “Хайртай” гэдэг үг шиг

Нэг ч удаа царайг нь харж байгаагүй гүнжийг аврахын төлөө арван таван толгойтой атгаалжин хар мангастай зоригтойгоор байлддаг эрчүүдийн тухай үлгэр домог олон бий. Бас болоогүй ээ, мангасын савраас бүсгүйгээ аврангуутаа дурлаж насан туршдаа амар сайхандаа жаргана гээч.

Хэдий энэ бүхэн домог төдий ч, эндээс эр хүний зүрх яаж “ажилладаг” нь харагдаж байна. Тэдний хувьд тэмцэж тулалдаж байж тэр бүсгүйг аварсан нь л чухал. Тиймдээ ч тэр хатуу “олз”-оо нандигнаж, үүрд халамжлан хайрлаж байгаа юм. Хэн нэгнийг хайрлах үед дотроос төөнөдөг тэр мэдрэмж нь магадгүй хоёр хүйстний хувьд ялгаагүй байх.

Гэхдээ дурлах үе шатууд нь эрэгтэй эмэгтэй хүнд өөр, өөр байдаг юм. Эмэгтэй хүний дурлалыг бялуурмаар их аз жаргал, бөөн бөөн “санаад байна” гэсэн мессежээр дүрсэлж болно. Харин эрчүүд дурлахаараа… энэнээс арай өөр. Дурласан эр хүн урьд өмнөхөөсөө илүү аз жаргалтай болдог ч, тэр мэдрэмж нь тийм ч хурдан хайр болчихдоггүй. Харин эмэгтэйчүүд бид хүчтэй дурласан үедээ, шууд л бүх зүрх сэтгэлээрээ хайрлаж эхэлдэг мэдрэмтгий хүмүүс. 

Эрчүүдийн дурлалын үе шатууд

1-р шат – Шохоорхох

Энэ бол зөвхөн гадаад төрхөнд хоромхон зуурт сэтгэл татагдахтай хамаатай үе шат юм. “Эрэгтэй хүн нүдээрээ дурладаг” гэдэг үг зүгээр ч нэг гарчихаагүй юм шүү. Зөвхөн гоо үзэсгэлэнгээс хамаарах энэ өнгөцхөн үнэлгээ тэдний хувьд нэгдүгээр зэрэгт тавигдах чухал шалгуур байдаг нь нууц биш юм. Эмэгтэйчүүд бид ихэвчлэн эхний харилцан ярианы дараа дурлаж эхэлдэг ч, эрэгтэй хүн анхны харцаар л дурлаж чаддаг. Эр хүн болгонд гоо үзэсгэлэнг тодорхойлох өөрийн гэсэн үнэлэмж бий. Цэвэрхэн царай, жижигхэн давхраатай нүд, урт хөл, бүр гараараа үсээ оролдох байдал гэх мэт эмэгтэй хүний тодорхой шинж чанаруудад эрчүүд өөр өөрөөр татагддаг.

2-р шат – Шунах

Эр хүн өдөрт л хэдэн арван эмэгтэйчүүдийг гадаад төрхийнх нь хувьд шохоорхдог. Тэд бараг л шохоорхсон бүсгүй бүрийнхээ нүдэнд өртөх гэж оролдоно. Харин оролдлого бүр янз бүрийн шалтгаанаар тийм ч амжилттай болдоггүй. Хэдий эрэгтэй хүн өдөр болгон сайхан бүсгүйчүүдийг их бага хэмжээгээр шохоорхож байдаг ч, бүгдэд нь шунан тэмүүлдэггүй нь үнэн юм. Гадаад төрхөөсөө гадна өөр нэг онцгой чанараараа сэтгэлийг нь татсан бүсгүйчүүд л эрчүүдийн шуналыг хөдөлгөж чаддаг. Эрэгтэй хүн өөрт таалагдсан бүсгүйнхээ анхаарлыг татахын тулд олон арга хэрэглэдэг. Гэвч хэрэв тэр бүсгүй нь түүнийг хүлээж авахгүй байвал, эр хүн зүгээр л түүнийг өдөрт хэдэн арваараа тааралдаж байдаг сайхан бүсгүйчүүдийн нэг нь гэж бодоод мартах болно. Маргааш нь түүнийг өдөж байснаа ч санахгүй. Яагаад гэвэл эрэгтэй хүний ухаан санаа дурлахаасаа өмнө маш олон үе шатыг даван туулдаг.

3-р шат – Татагдах

Хэрэв тэр бүсгүй өөрийнх нь хичээл зүтгэлд хариу үйлдэл үзүүлэх юм бол, сэтгэл татагдах үе шат руу орно гэсэн үг. Энэ шат руу орох хүртэл, эрэгтэй хүн бүсгүйгээ хэзээ хүссэн цагтаа юу ч болоогүй юм шиг орхин одож чадахаар байдаг. Учир нь үүнээс өмнө эрэгтэй хүн харамсахаар их хичээл зүтгэл ч гаргаагүй, дурлаа ч үгүй байдаг болохоор хаягдсан ч тоодоггүй. Зүгээр л азаа үзэж байсан гэсэн үг. Гэвч хэрэв бүсгүй нь эрэгтэйдээ үл ялиг ч болов зөвшөөрсөн хариу үйлдэл үзүүлэх юм бол, сэтгэл татагдах үе шат руу орно. Энэ шатандаа орсон эрчүүд бүсгүйдээ бүрэн таалагдахын тулд ямар нэг юм хийх эсэхээ шийддэг.

4-р шат – Сэтгэгдэл төрүүлэхийг оролдох

Эрэгтэй хүн ямар дараалалтайгаар дурладгийг ойлгоно гэдэг тийм ч амар юм биш байгаа биз? Гэвч чин үнэнийг хэлэхэд, түүнийг 4-р шат руу орсон хойно ч дурлал хаа хол байдаг. Тэр энэ шатанд ч зөвхөн бүсгүйдээ таалагдах зүйлсийг л хийхэд хамаг анхаарлаа төвлөрүүлсэн байдаг юм. Тэд бүсгүйдээ ямар сайн түшиг болж чадахаа харуулахын тулд болзоонд урьж бэлэг өгнө. Тэглээ гээд ч тэр чамд дурлачихсан гэсэн үг биш. Тэд зүрх сэтгэлийн хувьд үнэхээр хашир хүмүүс юм шүү. Гэхдээ хэрэв тэр ингэж хичээж байвал, ямар ч байсан энэ харилцаанаас эерэг зүйл хүлээж байгаа нь тодорхой байна.

5-р шат – Итгэл үнэмшил олох

Хэрэв тэр өмнөх шатуудыг амжилттай давсан бол, дараанаас нь чамайг өөрт нь ямар байгааг мэдэхийг хүснэ. Тэр чамд дурлахаасаа өмнө, чамайг л өөртөө бүрэн дурлуулахыг хичээх болно. Учир нь тэд энэ үедээ хаягдахаас маш их эмээсэн байдалтай байдаг. Тэр энэ үед өөрийгөө чамд ямар их татагдаж тэмүүлж байгааг мэдрэх боловч, эргэлзсэн, айсан хэвээр байна. Чамайг өөрт нь лавтайяа талтай гэдгийг мэдэхээс нааш түүний санаа амрахгүй. Эрэгтэй хүн жирийн найз байсан бүсгүйдээ дурласан тохиолдолд энэ үе шат түүний хувьд “шийдвэрлэх тулаан” л гэсэн үг. Урьд нь найзууд байсан тохиолдолд гэнэт л янз бүрийн бэлэг авч өгөх юм уу, болзоонд урьчихаж болдоггүй болохоор эмэгтэйтэйгээ ганцаараа үлдэх боломжийг эрэхийн тулд эрчүүд ухаанаа бардаг. Энэ үе шатанд эр хүний боддог ганц зүйл бол “Яаж таалагдах вэ?”.

6-р шат – Баталгаажуулах

Хэрэв тэр өмнөх шатанд бүсгүйгээ өөртөө дурлуулж чадсан бол, одоо тэр тун жаргалтай байгаа. Энэ дурлалын тоглоомын өрнөл түүнд таалагдаж байна гэсэн үг. Гэвч өөрөөсөө шалтгаалах бүх хичээл зүтгэлийг гаргасныхаа дараа ч, тэр өөрөө бүсгүйдээ дурласан эсэхтээ эргэлзсээр л байдаг. Энэ шатыг хүртэл түүний анхаарал зөвхөн эмэгтэйгээ өөртөө дурлуулахад хандаж байсан. Харин бүсгүй нэгэнтээ түүнд дурласан бол, тэр цагт л эр хүн түүнтэй жинхэнэ харилцаа тогтоох талаар бодож эхэлдэг. Маш аминчхан алхам байгаа биз? Гэхдээ энэ бол хүн төрөлхтний хувьслын эрчүүдэд суулгаж өгсөн зарчимтай хамаатай. Бүсгүйгээ өөртөө дурлуулж чадсан залуу, хэд хоногийн турш түүнтэй үерхэхийн сайн ба муу үр дагаврыг тооцоолно. “Би ч бас түүнд хайртай билүү?”, “Би түүнтэй хамт аз жаргалтай байх уу?”, “Тэр миний хүсэж явдаг эмэгтэй мөн үү?” гэх мэтээр өөрөөөсөө асууна.

7-р шат – Тэр хайрлахад бэлэн болжээ

Хэрэв эр хүн бодох хугацаандаа өөрөө ч бас түүнд сэтгэлтэй гэдгээ таних юм бол зүрхээ бүрэн зориулахад бэлэн болно гэсэн үг. Нөгөө талаас, хэрэв бодсоны эцэст тэр бүсгүйг өөртөө тохирохгүй гэж тодорхойлсон бол түүний сонирхол гэнэт буурч, анхаарлаа хандуулахаа больж магадгүй. Учир нь өмнө нь тэр зүгээр л өөрийнхөө сониуч зангаас болж бүсгүйн араас үхэн хатан гүйж байсан.

Тоглоомын ялалтыг өөрийн талд хандуулах нь

Эрчүүдийн дурлал ямар ядаргаатай гэдгийг бүгдээрээ сая мэдэж авлаа. Ялангуяа өөрөө дурлаагүй мөртлөө, эхлээд эмэгтэйгээ өөртөө дурлуулаад авахыг хичээдгийг нь бодохоор бүр ч дургүй хүрмээр. Гэхдээ тэдний зүрх ингэж програмчлагдсан учраас өөр ямар ч сонголт байхгүй. Хэрэв чи тоглоомыг өөрийнхөө талд шийдмээр байвал, юу юуны духанд хүрэлгүй түүнийг өөртөө таалагдаж байгааг мэдрүүлэх хэрэггүй. Ингэснээр тэр чиний төлөө улам их хөдөлмөрлөж, чамайг өөрийн болгосныхоо дараа хэзээ ч тавьж явуулахгүй.