Хэт хурдан дур тавилт гэж юу вэ?

Энэ удаагийн зөвлөгөөг эрчүүдэд зориулж байна. Эрчүүдийн сэтгэлийг зовоодог асуудлын нэг бол яах аргагүй хэт хурдан дур тавилт. Бэлгийн харьцаанд ороод хоёр минутаас богино хугацаанд дур тавьдаг бол тухайн хүнийг хэт хурдан дур тавьдаг буюу бэлгийн сулралтай гэж ойлгодог.

Харин сүүлийн үед анагаах ухаанд энэ талаарх  судалгаа, эмчилгээний арга хөгжихийн хэрээр богино хугацаанд үрийн шингэнээ гадагшлуулах байдлыг нарийвчлан оношлох болсон. Өнөөдрийн байдлаар дэлхий нийтэд таван минутаас богино хугацаанд дур тавьж байгаа бол хурдан дур тавилт гэж үздэг. Харин гурван минутаас богино хугацаанд дур тавьж байгаа бол үүнийг хэт хурдан дут тавилт гэж ангилан үзэж байна.

Мөн бэлгийн хавьтал хийхээс өмнө, эсвэл эхэлсний дараа шууд үрийн шингэнээ гадагшлуулах гэж ялгах тохиолдол ч байдаг. Гэвч энэ үзэгдлийг яаж ч нэрлэж, яаж ч ханддаг боллоо гээд цөөнгүй эрчүүдийн хувьд сэтгэлийг нь зовоодог гол асуудлын нэг болсоор байна. Хэт хурдан дур тавилт нь эрүүл мэндийн асуудал, эсвэл эрхтний бүтэц буюу хэт мэдрэмтгий байдлаас үүдэлтэй эсвэл сэтгэлийн хямрал, сэтгэл гутрал, анхны азгүй тохиолдлоос тогтсон хямрал, бэлгийн амьдрал эхлэх үеийн сэтгэл хөдлөл, айдастай холбоотой байх нь элбэг. Тиймээс юун түрүүнд эмчийн үзлэг, асуумж чухал нөлөөтэй.

Үүний дараа бэлэг эрхтний хэт мэдрэмтгий байдлыг оношлодог тусгай төхөөрмжийн тусламжтайгаар оношлогоог явуулна. Ингээд оношлогооны хариунаас хамаарч мэс заслын ба мэс заслын бус гэсэн аргаар эмчилж болно. Бэлэг эрхтний хэт мэдрэмтгий байдлаас үүдэлтэй хурдан дур тавилт гэж оношлогдох тохиолдолд мэс заслын аргаар эмчилгээг хийнэ. Харин сэтгэл зүйн шалтгаантай байх тохиолдолд мэс засал хийсэн ч төдийлөн үр дүнтэй байж чаддаггүй.

Шодой болон бэлэг эрхтний толгой хэсэг рүү гарсан мэдрэлийн ширхэгүүд байдаг ба тэр нь газар зүйн байршил, улс үндэстний онцлог болон хувь хүний биеийн онцлогоос шалтгаалан салаалалт, тоо ширхэгийн хувьд харилцан адилгүй байдаг. Бэлэг эрхтэн рүү салаалж гарсан үндсэн 2-3 мэдрэлийн ширхэг байдаг ба эдгээр ширхэгүүд нь шодой болон толгой хэсэг рүүгээ салаалж салбарласан олон тооны мэдрэлийн ширхэгүүдтэй болсон байдаг. Энэ онцлогоос болж бэлэг эрхтний толгой хэсэг мэдрэмтгий болж бэлгийн харьцааны үед амархан дур тавьдаг. Энэ бол өвчин биш хувь хүний биеийн онцлог.