Эмч нар суултуур дээр 10 минутаас удаан суухгүй байхыг зөвлөж байна

Одоо үед хэн болгон ухаалаг утастай болсон учир хүмүүс нойлын суултуур дээр урт хугацаагаар суудаг болсон. Тэгвэл мэргэжилтнүүд урт хугацаагаар суултуур дээр суух нь эрүүл мэндэд сөргөөр нөлөөлнө гэдгийг анхааруулж байна. Даллас дахь Техасын баруун өмнөд анагаах ухааны төвийн бүдүүн гэдэсний мэс засалч Лай Шуэ хэлэхдээ суултуур дээр удаан суух нь шамбарам, аарцгийн булчин сулрах эрсдэлийг нэмэгдүүлдэг гэжээ.

Шуэ “Өвчтөнүүд над дээр ирэхэд бидний өөрчлөх ёстой гол асуудлуудын нэг нь суултуур дээр удаан суух явдал байдаг” хэмээсэн юм. Нью-Йоркт байрладаг Стони Брүүк анагаах ухааны төвийн гэдэсний үрэвсэлт өвчний төвийн захирал Фара Монзур хэлэхдээ хүмүүс дунджаар суултуур дээр таваас арван минутыг зарцуулах хэрэгтэй гэсэн байна. Яагаад шамбарам, аарцгийн булчин сулрах эрсдэлтэй гэдгийг Шуэ тайлбарлахдаа удаан суувал “Аарцаг руу цус орж, буцаж гарахааргүй болдог” гэжээ. Үүний улмаас анус, шулуун гэдэс орчмыг тойрсон судаснууд тэлж цусаар дүүрч шамбарам үүсэх эрсдэл нэмэгддэг байна. Зууван хэлбэрийн суултуур нь өгзгийг шахаж, татах хүчний нөлөөгөөр анус, шулуун гэдэс орчим цусны эргэлт саатсаны улмаас судас тэлдэг аж.

Үүнээс гадна хүчилж, дүлэх нь шамбарам үүсэх эрсдэлийг нэмэгдүүлдэг байна. Суултуур дээр удаан суух нь шамбарам үүсэх эрсдэлийг нэмэгдүүлдгээс гадна шулуун гэдэс урваж гарч ирэхэд хүргэж болзошгүй. Калифорни мужид ажилладаг гастроэнтерологич Лэйнс Урадомо утас, сэтгүүл гэх зүйлсийг ариун цэврийн өрөөндөө авч орохгүй байхыг зөвлөжээ. Харин Шуэ зөвлөхдөө арван минут суугаад болохгүй байвал босоод бага зэрэг алхах хэрэгтэй гэсэн юм. Мөн шаардлагатай хэмжээний ус ууж, ислэгтэй хүнс хэрэглэхийг Шуэ зөвлөсөн байна.

Эх сурвалж: Eguur.mn