Эрэгтэй хүн бол ХҮН юм

Мод, чулуу, төмөр биш. Тэд гомддог, баярладаг, гунигладаг, хөөрч догдолдог, урам хугарч бас гунддаг. Дандаа битгий хүчтэй байхыг шаардаарай. Угаасаа өөр сонголт манай нийгэмд алга, хүссэн хүсээгүй тэд үр хүүхэд хань ижлийнхээ төлөө хүчтэй байна. Хангалттай хүчтэй байгаагүй зарим нэг эрчүүдээс болж хомроголон тэднийг битгий буруутгаарай.

Амьдралаа босгох гэж хичээж яваа эрчүүд андашгүй, тэд чимээгүй хөдөлмөрлөж, чимээгүй алдар гавъяагаа хүртэж явдаг. Тэд заримдаа алжаал ядаргаагаа тайлах гэж агуйдаа орох үед нь битгий араас нь чаргууцалд. Эрэгтэй хүнийг хааш нь чиглүүлэх бидэнтэй их хамаатай юм шиг. Хааяа зүгээр тайван орхих, гомдол гунигаа тайлах цагийг нь өгөх, өөртэйгээ ярилцаж гаргалгаагаа олгох боломжийг нь өгдөг байя бүсгүйчүүдээ.

Тэд биднийг дандаа л аз жаргалтай байлгах албагүй. Тэд төгс нөхөр, төгс аав биш байж болно, учир нь анх удаа л бид эхнэр болж үзэж байгаа шиг тэд ч бас анх удаа л нөхөр болж үзэж байна. Бид анх удаа ээж болж үзсэн шиг тэд ч бас анх удаа аав болж үзэж байгаа учир ижил гараанаас гарсан гэдгээ ойлгож их зүйл нэхэхээ больё!

Тэд бидний нөхөр боллоо гээд бидний өмнө хад чулуу шиг байх үүрэг хүлээгээгүй юм. Тэд шантарч магадгүй, заримдаа үнэхээр бүх юм хэцүү санагдаж магадгүй, хамаг юмаа хаяад зугтмаар ч санагдаж магадгүй. Тэглээ гээд тэд тэгсэнгүй, хажууд маань байсаар л…

Заримдаа хажууд байгаа нь ч хангалттай их тэвчээр байж болох…

Эрэгтэй хүнийг хүн гэж хардаг байя. Эрэгтэй хүнийг зодож болдог, эмэгтэй хүнийг зодож болохгүй гэдэг ойлголтоосоо салцгаая!!!

Эрэгтэй эмэгтэй аль аль нь хүн болж төрсөн учир аль аль нь л тэгш эрхтэй байж, эмэгтэй хүүхдээ ч эрэгтэй хүүхдийг зоддог болгож өсгөмөөргүй байна. Эмэгтэй хүүхэд аав ээждээ чухлын адил эрэгтэй хүүхэд ч мөн адил чухал!!!!

Таны нөхөр таны хадам ээжийн шөнө нойргүй хонож өсгөсөн хүүхэд нь, таны нөхөр ээжийнхээ аз жаргал, утга учир нь байсан юм. Та үр хүүхдээ хайрладаг шиг тийм хайраар таны нөхөр услагдаж өссөн юм. Тиймээс хахир хатуу байхаа больж, хааяа ч болтугай хэдэн үгийг нь бүтэн сонсож ойлгохыг хичээцгээе. Хааяа ч гэсэн үр хүүхдээ магтдаг шигээ хань ижлээ магтдаг байя! Тэд чинь сэргээд л явчихна. Өршөөж болох алдааг нь сүр болголгүй өршөөж суръя, харин дахин тэрийг нь сөхөж сэтгэл рүү нь ус цацах хэрэггүй. Нэгэнт өнгөрсөн юмыг өнгөрсөнд нь үлдээгээд сурцгаая.

Эрчүүд минь та нар маань эрүүл мэнддээ анхаарч хайрт эхнэрээ олон жил хайрлаж, үр хүүхдүүдийнхээ ямар хүргэн бэр дагуулж ирэхийг харж, ач зээ нар чинь яаж таныг дуурайхыг харж баясаж, тэдэндээ хайр ерөөлөө өгч урт наслах хэрэгтэй шүү.