Б.Баттулга: Сүүлийн үед зарим эмэгтэйчүүд мансууруулах бодисны төлөө биеэ үнэлэх болсон

ЦЕГ-ийн хар тамхитай тэмцэх хэлтсийн дарга Б.Баттулга мансууруулах бодистой холбоотой мэдээлэл өглөө.

Тэрбээр, “Долоодугаар ангийн хүүхэд мансуурууах бодис хэрэглэсэн тохиолдол хоёр удаа бүртгэгдсэн. Жил ирэх тусам хүүхдүүдийн хэрэглээ болон насны хувьд залуужиж байна. Үүнийг задлаад үзэхэд маш олон төрлийн зүйл нөлөөлж байна.

Хамгийн эхэнд хүүхдүүдэд чөлөөт цагаа өнгөрүүлэх газар байхгүй. Мөн эцэг эхийн хараа хяналт бага. Өөртөө итгэх, итгэлгүй байдал, залуу уран бүтээлчдийн дуу гэх мэт зүйлс хүүхдүүдийг мансууруулах бодис хэрэглэх сонирхолыг нь татдаг.

Мансууруулах бодис хэрэглэдэг хүүхэд зан төлвийн хувьд өөрчлөгддөг. Хэрцгий догшин авиртай болно. Мөн ямар ч гэмт хэрэг хийж, ял шийтгэл хүлээхээс айх айдасгүй болчихдог. Үүнийгээ дагаад мансууруулах бодис олж авахын тулд, хулгай дээрмийн хэрэг их хийдэг.

Мөн манай улсад зарим эмэгтэйчүүд мансууруулах бодисны төлөө биеэ үнэлэж байгаа хэрэг бүртгэгдэх болсон” гэлээ.

Б.НОМТ
SOURCE: Eguur.mn