ДОХ-ын халдвар нууцаар тээгчид Монголоор нэг бэлчиж явна

Хэдхэн жилийн өмнө монголчууд ДОХ өвчний хоёрхон тохиолдол илэрсэнийг сүр бадруулан ярьж байсан билээ. Долоо билүү найм дахь тохиолдол нь илэрсэний дараа бадарсан сүр улам ч хүчтэй дэвэрч “Ер нь энэ Монгол орон чинь ДОХ-ын хөнөөлд том жижиггүй нэрвэгдлээ. Тэр хэдэн ДОХ-той нөхдүүдийг нэгмөсөн нийгмээс тусгаарлая. Эсвэл улс орон даяар нэр усыг нь зарлая. Алийн болгон далд нууцаар халдвар тарааж яваа хүмүүсийн золиос болох юм бэ” гэх мэтээр дээр дооргүй л шуугиж байсансан. Харин ДОХ-ын 15,16 дахь тохиолдол илэрсэний дараа ЭМЯ-ны сайд нь л хааяа нэг мартсанаас мал мэнд үү гэдэг шиг “Хөөө та минь ээ, бэлгэвч хэрэглэе бэлгэвч” гэж орилохоос өөрөөр хүмүүс анзаарахаа больсон билээ. Тэгсэнээ 46 дахь ДОХ-ын халдвар тээгч илэрчихээд байхад л хамрын ханиадаар 46 хүн өвдчихсөн юм шиг л хэнэг ч үгүй явж байлаа. Энэ нь зөвхөн ганц монголчуудын зан араншинтай ч холбоотой зүйл биш юмсанж. Эдүгээ 45 мянган хүн нас барж бараг сая хүн нь халдвар тээгч болчихоод байгаа Бирмд л гэхэд арван жилийн өмнө яг л манайх шиг дөнгөж дөрөв таван хүн ДОХ-ын халдвартай нь илэрмэгц хүүе хаая яадаг билээ ийдэг билээ гэлцэн сүйд болж байсан аж. Гэтэл өнөөдөр тус улсын Эрүүл мэндийн яамнаас саяхан гаргасан судалгаагаар ДОХ нь үндэсний эмгэнэл болчихоод байгаа ажээ. Манай улс ч ялгаагүй өнөөдөр яг л тэр жишгээр явж орсоныг өнөөдрийн үл тоомсорлосон хайхрамжгүй байдал харуулж байна. Нэг ДОХ-той хүний ард 500 халдвар тээгч байдаг гэсэн судалгаа бий. Хэдэн жилийн өмнө энэхүү тоог сонсоод олон хүмүүс “Арай ч дээ. Нэг хүн хичнээн ДОХ-той байсан ч 500 хүнтэй явалдахгүй. Ёстой нөгөө 300 мянган хүн нь ДОХ-той гэж яригддаг Хятадад л тийм байдаг байлгүй” хэмээн эргэлзэж байв. Тэгвэл нарийн мэргэжлийн эмч нар ямар ч байсан нэг ДОХ-той хүн маш дотны 5-6 хүнтэй байнга бэлгийн харьцаанд ордог. Тэрхүү 5-6 хүн нь бас цаашаа дамжуулна. Иймэрхүү гинжин урвалаар дүн гаргах юм бол нэг ДОХ-той хүний ард 500 хүн бий гэсэн тооцоо гаргасан нь амьдрал дээр нотлогдоод байна. Харин энэ тоог бариад л доогийн байдлаар бидэнд мэдэгдээд байгаа 46 ширхэг ДОХ-той нөхдийн байдлаар авч үзвэл Монгол улсад маань ДОХ-ын халдвар нууцаар тээж яваа 25 мянган хүн байна гэж үзэж болохоор байгаа биз. Энэ бол Монгол улсад ДОХ-той нөхдүүд үнээ мал шиг л бэлчиж явна гэсэн үг биш үү. Тэгээд ч хүн амынхаа тоонд хуваавал бараг л Бирмийн хэмжээнд оччихоод байгаа манай улсын хувьд үндэсний эмгэнэл гэдэг үгийг хэрэглэсэн ч буруудахгүй юм шиг.

SOURCE: Ноцтой мэдээ