“Галзуу хулгана”-ыг ухаалгаар арчлахгүй бол иймэрхүү юм болж магадгүй шүү

Манайхан “Галзуу хулгана”, Оросууд “Америк гулгуур”, америкчууд “Орос гулгуур” гэж нэрлэдэг энэ зугааг кино, зурагтээр бүгд харж байсан. Сүүлийн нэг жил УБ-т бүгд бодитоор харж, сууж зугаацах боломжтой болсон. Энэ нэг талаас сайн гэдэгтэй маргах хүн гарахгүй биз. Харин нөгөө талаас эрсдэл ихтэй энэ зугааг зохион байгуулж байгаа хүмүүс асар их хариуцлага хүлээж байгаа гэдгийг ямагт санаж байх хэрэгтэй.

Үгүй бол энэ мэт таагүй явдал гарахгүй үгүйсгэх аргагүй. /түй түй. мод тогшив/ Екатеринбург буюу манай ганзагчдын хэлж сурсанчлан Свердловск хотын галзуу хулгана үзүүлэн дээр осол гарчээ.

Асар хурдтай явж байсан “галзуу хулгана” явуут дундаа замаас гарч таван метрийн өндрөөс унасан байна. Үүнээс болж гурван хүн хүнд гэмтэл авч эмнэлэгт хүргэгджээ.

Оросын цагдаа нар энэ хэрэгт эрүү үүсгэн мөрдөн байцаалт явуулж байгаа бөгөөд зохион байгуулагч нь аюулгүй байдлын шаардлагыг хангах талаар шаардлагатай арга хэмжээ аваагүй нь тогтоогдвол зургаан жил шоронд суух ял авна.

Манай хэд ер нь юмаа шалгадаг юм уу даа бүү мэд. Аягүйтвэл осол гарсны дараа л бөөн дуулиан болж хоёр долоо хоноод ахиад л мартах байх даа.