Амьдрах сайхан

Сайн байцгаана уу би өмнө нь энэ сайтад хэд хэдэн удаа нийтлэл оруулж байсан юм. Одоо ч мөн бичиж байна. Өөрийнхөө амьдрал дотроо хутгалдаад хөндлөнгөөс дүгнэж чадахгүй байхад болсон бүх зүйлсийг энд бичихэд хөндлөнгийн нүдээр хүмүүс их сайхан зөвлөдөг санагддаг юм. Хараах загнах зүйл байдаг ч гэсэн өгсөн зөвлөгөө бүрээс нь авахыг авж хаяхыг нь хаяж байгаа учраас зөвлөгөө өгсөн хүн бүрт их баярлалаа. Өмнө захиандаа би бүх зүйлээ ярьдаг эрэгтэй найз минь надад илүү дотно болох санал тавьж, би хүлээн зөвшөөрснөөр миний алдаа эхэлсэн тухай бичиж байсан юм. Түүнийг би их эрхлүүлж, их хайрласан ч тэр нь түүнд чамлалттай байсан байх.

Та бүхэн санаж байвал нөгөө далласан газар нь ил гарч далайсан газар нь далд ордог болчихоод байна гэж бичиж байсан. Тэр үед хайртай л юм чинь би ингээд ч болтугай хажууд нь байя гэж бодож байлаа. Хүмүүсийн өгсөн зөвлөгөө бүр надад их хүч, итгэл өгсөн. Эмэгтэй хүн үнэ цэнэтэй байх ёстой гэдгээ ухаарсан. Тэр үнэ цэнээ хадгалж үлдэхийг хүссэн учраас тэр залуугаас би сексийн харилцаагаа тасалсан. Гэхдээ би түүнийг ор мөргүй амьдралаасаа хаяагүй. Учир нь би түүн шиг зан гаргахыг хүсээгүй. Хүн чигээрээ үлдэхийг хүссэн гэхүүдээ. Хааяа тэр хэцүү байна, өвдлөө гэхэд нь очиж тусалдаг хэвээрээ л байгаа.

Гэхдээ түүнийг хардаг байсан харц, хүлээдэг байсан сэтгэл минь өөрчлөгдсөн. Энэ тийм амар байгаагүй ч хүн хичээвэл болдог юм байна лээ. Одоо би ажилтай, сурдаг сургуультай, зорьсон зорилготой, хичээллэдэг спорттой, хөгжүүлж байгаа хоббитой болсон. Бас саяхнаас нэг залуутай болзож эхэлсэн. Миний хүссэн тэр харилцааг тэр залуу надад өгдөг. Намайг хүндэтгэдэг, хайрладаг, харилцан бие биетэйгээ ярилцдаг, бас надад зориулж хоол хүртэл хийж өгдөг, сексийн хувьд ч ганцхан хүнд л сайхан байдаг тэр мэдрэмж биш хамтдаа сайхан байдаг тийм мэдрэмжийг авч байгаа.  Хэцүү байсан, өрөвдөлтэй байсан тэр үеэ даваад гарсан. Одоо уулзаж байгаа залуу минь цаашид ямар зан гаргахыг би мэдэхгүй ч гэсэн бидний дунд итгэл, хүн хүний хүндлэх сэтгэл байгаа болохоор, бас миний зүгээс би эмэгтэй хүн үнэ цэнэтэй байх ёстойгоо ухамсарласан учраас өөртөө итгэлтэй байгаа.

Эцэст нь хэлэхэд хайргүй хүний араас явж өөрийгөө зовоох, сэтгэлээ шархлуулах ямар ч утгагүй юм байна лээ шүү. Өөрийг чинь хайрладаг залуутай байх л жаргалтай юм. Өөдөөс минь харж байгаа харц нь хүртэл дулаахан санагдаж, хийж байгаа үйлдэл нь ч гэсэн өөрийгөө биш намайг бодож байгаа нь харахад хүртэл сайхан байж, ийм залууг гомдоох эрх надад байхгүй, би энэ хүнийг жаргалтай байлгах ёстой гэж бодогддог. Хэрэгтэй хэрэггүй зүйл биччихлээ. Ийм мэдрэмжээ хуваалцмаар санагдсан юм  та бүхэнд баярлалаа…