Залуус жирэмсэн биеэ үнэлэгчдийг илүү сонирхдог

-Архи, янханд живсэн Улаанбаатар-

Залуусын нэрлэдгээр “Баасан ахын өдөр” Сүхбаатар дүүргийн Цагдаагийн хэлтсийн Хэв журмын тасгийн бие бүрэлдэхүүн дүүргийнхээ нутаг дэвсгэрт нэгдсэн арга хэмжээг зохион байгуулсан юм. Энэ үеэр бид Улаанбаатар хотын төв цэгт орших Сүхбаатар дүүргийн нутаг дэвсгэр дээрх нэгэн шөнийн амьдралыг сурвалжиллаа. Хүний хөл хөдөлгөөн ихтэй, тус дүүргийн нутаг дэвсгэрт их дээд сургуулиуд, яамд, засгийн газрын ордон оршдог ч бас цөөнгүй баар цэнгээний газар, зочид буудал байрладаг. Мөн Сүх жанжны талбай болон Улаанбаатар зочид буудлын урд цэцэрлэг Лениний хөшөөний хавиар биеэ үнэлэгчид ихээр цугладаг билээ. Иймээс цагдаагийнхан ажлын өдөр шувтран амралтын өдөр залгах шөнө нэгдсэн арга хэмжээ зохиосон нь бас учиртай юм. Нэгдсэн арга хэмжээ 23 цагийн үед Сүхбаатарын талбай, Улаанбаатар зочид буудлын урд талын цэцэрлэгээс биеэ үнэлэгчдийг хомроголон баривчлах ажиллагаагаар эхэллээ. Дээрх газруудад 20-50 насны янхнууд тогтмол биеэ үнэлдэг байна.

Харин өвөл ойртож, хүйтэрсэн тул 20 гаруй насны охид нь таксины жолооч нараар зуучлуулан, биеэ үнэлдэг. Иймээс 30-50 насны эмэгтэйчүүд ажлын байран дээрээ үнэнч үлддэг аж. Цагдаагийнхан тэнд байсан болон ойр хавьд нь зогсч байсан жижиг тэрэгний жолооч, дотор нь суусан охидыг баривчлан, цагдаагийн хэлтэс дээрээ аваачсан юм. Тус дүүргийн цагдаагийнхан үе үе гэнэтийн арга хэмжээ зохиодог тул зарим хашир биеэ үнэлэгчид өөр дүүргийн нутаг дэвсгэр дамнан биеэ үнэлдэг болжээ. Энэ үеэр нийтдээ 30 орчим биеэ үнэлэгчид, 10 гаруй таксины жолооч болон биеэ үнэлэгчдийг зуучилдаг залуусыг баривчиллаа. Тэдний дунд өвлийн хүйтэнд нимгэн хувцаслан, нүүр амаа тодоор будсан хүүхнүүд байхад бас хэн ч хараад биеэ үнэлдэг гэж хэлэхээргүй эмэгтэйчүүд ч мөн байсан. Үүгээр ч барахгүй тав, зургаан сартай жирэмсэн хэрнээ биеэ үнэлэгчид цөөнгүй байв. 30-аас дээш насны биеэ үнэлдэг эмэгтэйчүүдийн хувьд амьдралын эрхээр энэ замыг сонгосон хэмээн ярьж байсан бол залуу охид ихэвчлэн бусдын хүчинд автах, уруу татагдах замаар биеэ үнэлдэг болжээ. Нэг ёсондоо анх биеэ үнэлдэг байсан эмэгтэйчүүд хөгшрөөд ирэхийн цагт залуу охидыг дарамтлан өөрсдийн замналаар явуулдаг байна. 23 настай н.Дэлгэрмаагийн ярьж буйгаар үерхдэг байсан залуу нь түүнийг зодож дарамтлан, хүчээр биеийг нь үнэлүүлээд, мөнгөөр нь архиддаг байжээ. Дөрөв, тав хоногийн өмнө түүнийг автобусны буудал дээр зодуулан, босож чадахгүй байхад нь Бүдүүн Заяа гэгч биеэ үнэлэгчдийг зуучилдаг / өмнө нь өөрөө биеэ үнэлж байсан/ эмэгтэй олж, тэнхрүүлээд дахин үндсэн ажилд нь оруулжээ. Биеэ үнэлэгчдийн тогтсон ханш нь цагийн 15 мянга, хоногийн 35 мянган төгрөг байдаг аж.

Мөн энэ үеэр таван сартай жирэмсэн мөртлөө биеэ үнэлдэг 35 настай, н.Ариунчимэгээс зарим зүйлийг тодруулсан юм. Тэрээр биеэ үнэлээд өдгөө тав, зургаан жил болж байгаа бөгөөд гурван настай хүүтэй гэнэ. Харин одоо хэвлийдээ байгаа хүүхдээ зуун айлд бай” даг эмэгтэйчүүдийн эмнэлэгт үзүүлэхэд /гаднаас хараад мэдэгдэхээр болсон/ургийг нь хөндөж болно гэсэн тул “мөнгө олж байгаад авахуулна” хэмээн ярьж байсан. Харин жирэмсэн биеэ үнэлэгчдийг хүмүүс хэр их худалдаж авдаг талаар сонирхоход тэрээр “Харин ч дуртай байдаг. Ялангуяа 20 гаран насны залуучууд их сонирхож авдаг” гэж байлаа. Ер нь 30, 40 гарсан янхнуудыг оюутан залуус их авдаг аж. Мөн сүүлийн үед 14-17 насны охидууд биеэ үнэлэгчдийн ертөнцөд хүч түрэн орж ирсэн тул “хөгшин” биеэ үнэлэгчдийг авах нь цөөрсөн ч бас тэдний эрэлт нь бүрмөсөн зогсчихоогүй юм байна. Насанд хүрээгүй охид ихэвчлэн 13 дугаар хороололд орших зочид буудал болон саун массажистийн газруудад байрладаг аж. Харин оюутан охидын хувьд баар цэнгээний газраар биеэ үнэлдэг байна.

SOURCE: Өглөөний сонин