Олон эртэй учир ургуулж явдаг эмэгтэйчүүдэд гарднереллез үүсэх магадлал хамгийн өндөр байдаг

Эрүүл эмэгтэй хүн бүрийн үтрээнд олон тооны бичил биет амьдарч байдаг гэвэл итгэх үү. Эдгээр бичил биетүүд хоорондын тэнцвэр алдагдаагүй үед ямар ч аюулгүй. Харин тэнцвэрт байдал алдагдангуут буюу дисбактериоз үүсгэдэг зарим нэгэн бактер хэвийн хэмжээнээс ихсэх юмуу, эсвэл багасч эмэгтэй хүний бэлэг эрхтэнд өвчин үүсэх бөгөөд үүнийг үтрээний бактержил буюу гарднереялёз гэдэг. Энэ өвчнийг гарднерелла вагиналис гэх жижиг бактер үүсгэдэг. Энэ бактер нь гол төлөв шээсний сүв, гадна бэлэг эрхтэнд амьдардаг. Бэлгийн хавьталын үеэр халдварладаг. Эмэгтэй хүний үтрээний бичил орчны тэнцвэр алдагдаж, ашигтай нянгуудын хэмжээ нь багасахад гарднерелла зэрэг ашиггүй бактерууд нь хүчтэй үржиж эхэлдэг. Гарднерелл нь гонококк, трихомонад, хламид, микоплазмтай хослосон байх нь элбэг.

Зөвхөн эмэгтэйчүүд өвчилдөг

Энэ өвчнөөр зөвхөн эмэгтэйчүүд өвчилдөг. Статистик мэдээнээс үзвэл 18- 50 нас хүртэлх эмэгтэйчүүдийн 20 хувь нь энэ өвчнөөр өвчилсөн байдаг. Үтрэз,ний бургуй, антибиотик хэрэглэх, үр тогтолтын эсрэг ерөндөг, үтрээний лаа зэргийг хэрэглэх үед үтрээний бичил орчны тэнцвэр алдагдах болзошгүй юм. Мөн дааврын түвшин алдагдах, дархлаа буурах, ядаргаанд орох үед бактерийн идэвхжил өсдөг. Олон эрчүүдтэй учир ургуулж явдаг эмэгтэйчүүдэд гарднереллез үүсэх магадлал нь хамгийн өндөр байдгийг олон жилийн ажиглалт, судалгаагаар тогтоосон байдаг. Эрэгтэйчүүдийн 90 хувь, эмэгтэйчүүдийн 50 хувьд нь гарднерелл ямар ч эвгүй мэдрэмж төрүүлдэггүй. Улмаар бактерийг тээгчийн хувьд бэлгийн хамтрагчдаа халдаах аюултай. Эмэгтэй хүн гарднереллез өвчтэй болсон гэдгээ маш тод нэг шинжээр таамаглах боломжтой. Энэ нь гадна бэлэг эрхтнээс их хэмжээний сааралдуу өнгөтэй, муудсан загасны үнэртэй ялгадас гарах явдал юм. Үүний зэрэгцээ бэлгийн уруул улайж хавдан шээх, бэлгийн хавьталд орох үед загатнаж хорсдог. Гарднерелл нь эрэгтэйчүүдэд бараг өвчин үүсгэдэггүй. Зөвхөн ганц нэг тохиолдолд л шээс дамжуулах сувгийн үрэвсэл үүсэх нь бий. Энэ тохиолдолд эрэгтэй хүнд ч гэсэн загасны өвөрмөц үнэртэй ялгадас бэлэг эрхтэнээс нь гарна. Бусад илрэлийн хувьд уретритийн үед ихэнхдээ илэрдэг хорсох, загатнах, эсвэл зүгээр л шээх үед эвгүй мэдрэмж төрөх зэрэг шинжүүд ажиглагддаг.

Сэжигтэй шинж илэрвэл шинжилгээ хийлгэх хэрэгтэй

Гарднереллезт байна гэж сэжиглэсэн үед бэлгийн замын өвчний эмч эсвэл арьс өнгөний эмчид заавал хандах хэрэгтэй. Онош тогтооход бэлэг эрхтэнээс наалдац авч шинжилгээнд өгч бактер ургуулдаг. Хэрэв өвчтэй хүний наалдацын эсийг микроскопоор харах юм бол тэдгээр нь гарднерелл нянгийн зузаан давхаргаар бүрхэгдсэнбайх нь харагдана. Мөн рН-г хэмжихэд илүүдэхгүй ба хэвийн үед үтрээний орчин хүчиллэг, харин гарднереллезийн үед шүлтлэг байдаг. Эцсийн оношийг изонитрил буюу ялгадасыг ялзарсан загасны үнэртэй болгодог бодисын хариу урвалын тусламжтайгаар тавьдаг. Энэ нь өвчтэй хүнд эерэг гардаг. Эмч цусны шинжилгээ нэмж бичиж болох бөгөөд энэ нь гарднереллезийн үед лейкоцитийн хэмжээ буурсаныг харуулна. Гэхдээ өөр бусад өвчний үед ч гэсэн мөн адил зүйл гарах боломжтой.

Урьдчилан сэргийлэлт

Гарднереллезийг антибиотикоор эмчлэх бөгөөд витамин, дархлаа сэргээх болон бичил орчныг тэнцвэрийг сэргээх болгох бэлдмэлүүдийг давхар хэрэглэдэг. Курс эмчилгээний дараа дахин наалдацын шинжилгээ өгөх хэрэгтэй болдог. Зөвхөн тухайн өвчтөн эмчлүүлээд зогсохгүй бүх бэлгийн хамтрагчид нь ч мөн адил эмчлүүлэх нь маш чухал. Гарднереллезийн урьдчилан сэргийлэлт нь бусад бэлгийн замын өвчнүүдийн сэргийлэлтээс нэг их ялгарахгүй.

Үүнд:

1. Бэлгэвч хэрэглэх
2. Тохиолдлын бэлгийн харьцаанаас зайлсхийх
3. Сэжигтэй бэлгийн хавьталд орсноос хойш хоёр цагийн дараа бактерийн эсрэг үйлчилгээтэй бодисоор угаалга хийлгэх.