Өсвөр насныхан сексийн талаар буруу ойлголттой байдгаас эрсдэлд унадаг…

Арван жилээ төгсч амьдралын их босгыг алхах гэж буй өсвөр насныхны хувьд төгсөлтийн үдэшлэгээрээ анхны сексийн харьцаанд орохыг хүсдэг аж. Төгсөлтийн үдэшлэгийг ихэнх залуус бэлгийн амьдрал эхлэх хамгийн тааламжтай мөч гэж үздэг байна.

-Зарим оронд хонхны баярын үдэшлэгийн дараа бага насныхны жирэмслэлтийн оргил үе болдог нь судалгаагаар тогтоогдсон байдаг.

-Төлөвшиж гүйцээгүй залуус том хүний амьдралд орох эхлэлийг яагаад ч юм секстэй холбон үздэг.

-Сургууль төгсөхөөс өмнө хувийн дотно харьцаанд орж амжаагүй хэсэг чухам хонхны баярын дараа ийм оролдлого хийх шаардлагатай, гарцаагүй байх ёстой зүйл гэсэн итгэл үнэмшилтэй явдаг. Дурсах юмтай ч болно. Гэвч харамсалтай нь залуус ийм арга хэмжээнд явахад хэрхэн биеэ бэлтгэх, хамгаалалт хэрэглэх талаар дийлэнх нь санаа тавьдаггүй.

Тиймээс хонхны баярын давтагдашгүй сайхан мөч залуусын болчимгүй алхмын гайгаар насан туршид үлдэх толбо, төлөөд баршгүй эмгэнэл болгохгүй байх, учир мэдэхгүй охид, мөн тэдэнтэйгээ адил хөвгүүдийн сексийн харьцаа нь хүсээгүй жирэмслэлт, гомдол цөхрөл зэрэг маш тааламжгүй үр дүнд хүргэж мэдэх эрсдэлтэйг тооцоол. Хоромхон зуур тэвчээр алдсанаар ямар хохирол амсаж болохыг сайтар анхаарах хэрэгтэй.

SOURCE: Үдшийн сонин