Биеэ үнэлэгчдийн дундах бэлгийн замын халдварын тоо буурчээ

Манай улсад бүртгэгдсэн ХДХВ/ДОХ-ын халдвар тээсэн иргэд 100 хувь бэлгийн замаар халдвараа авсан байдаг. Бэлгийн замаар дамжих халдвар, ХДХВ/ДОХ нь голчлон замбараагүй бэлгийн хавьтлаас үүдэлтэй бөгөөд энэхүү халдвараас найдвартай сэргийлж чадах ганц зүйл нь одоогоор бэлгэвч хэрэглэх л байна. Тиймээс ч дэлхий дахинаа бэлгэвчийн хэрэглээг нэмэгдүүлэх зорилготой “100 хувь бэлгэвч хөтөлбөр”-ийг хэрэгжүүлж байна. 

Манай улсын хувьд “100 хувь бэлгэвч” хөтөлбөрийг 2002 онд анх Дархан-Уул аймагт туршилтаар хэрэгжүүлж эхэлсэн юм. Хөтөлбөрийн үр дүнд Дархан-Уул аймагт бэлгийн замаар дамжих халдвар 32-оос 16 хувь болтлоо буурсан байна. Тиймээс өнөөдрийг хүртэл улсын хэмжээнд энэ хөтөлбөрийн сүлжээг ажиллуулж байна.

Энэ хугацаанд нийт 3 сая 132 мянган бэлгэвчийг нийлүүлсэн байна. Үүний улмаас биеэ үнэлэгчидтэй бэлгийн хавьталд орохдоо бэлгэвч хэрэглэдэг эрчүүдийн тоо 30,6-аас 48,9 болон нэмэгджээ.

Харин биеэ үнэлэгч бүрт хүрч ажиллахад тодорхой саад бэрхшээлүүд учирдаг байна. Биеэ үнэлэгчид Улаанбаатарын өмнө зогсохоо болиод баар цэнгээний газрууд, саунаар тархан “байрладаг” болсон нь тэдэнтэй тулж ажиллахад тохиож буй саад бэрхшээлийн нэг нь яах аргагүй болж байгаа ажээ.

Одоогийн байдлаар нийслэлийн хэмжээнд нийт 294 зочид буудал, 75 саун, 707 бар кафе ажиллаж байгаа юм.

Гэсэн хэдий ч тодорхой хэмжээнд нь хүрч ажилласны үр дүнд нийслэлийн биеэ үнэлэгчдийн дунд бэлгийн замын халдвар 6-8 хувь буурсан гэж үзэж байна.

Одоогоор 100 хувь бэлгэвч хөтөлбөрийг манай улсаас гадна Лаос, Хятад, Филлипин, Тайланд, Маянмар, Кампуч, Вьетнам зэрэг орон хэрэгжүүлж байна.

gogo.mn