Солонгос эрчүүд Монгол эхнэр авах явдлыг БНСУ төрийн бодлогоор дэмжиж байна

-Энэ тухай Жүүнг Анг Дэйли сонинд бичжээ-

Хагас сайн өдөр өглөө эрт Шин Ган Чул өөр найман солонгос залуугийн хамт гадаад эхнэртэйгээ хэрхэн харьцах тухай хороо хориноос нь санхүүжүүлсэн хичээлд суудаг. Эд бүгд 40-60 насны эрчүүд. Энэ бол Сөүлийн хойд зүгийн ажилчны район юм. Энд тэд долоо хоногт нэг удаа цуглаж Вьетнам, Узбек, Монгол гэх мэт хэлийг хоёр цаг орчим сурахаас гадна тухайн улсын хоол унд, ёс заншлыг бас суралцана. Хичээлийн дараа эдгээр эрчүүд соёл, сэтгэхүйн ялгаанаас үүдэн өөрсдөд нь тулгарч буй бэрхшээлтэй асуудлуудыг хамтдаа ярилцана. Солонгосын хөдөөний эсвэл боловсрол багатай, эх орноосоо эхнэр олж чадахгүй байгаа залуусын гадаад эхнэрүүд нь урьд нь нөхрийнхөө соёлыг суралцахыг хичээдэг байсан бол одоо энэ хандлага аажмаар өөрчлөгдөн солонгос эрчүүд эхнэрээ бөөцийлөх урлагт зайлшгүй хэрэгтэй гэдгийг аажмаар ухаарч байгаа гэнэ.

БНСУ-ын Статистикийн газрын судалгаагаар 100 солонгос эрийн найм нь гадаад эхнэр авсан ба хөдөөний залуусын 40 хувь нь гадаад эхнэр авсан гэдэг баримт байгаа гэнэ. Шин, түүний эхнэр Туяа хоёр солонгос зуучлагчаар (broker гэжээ сурв.) дамжуулан Дархан хотод гурван жилийн өмнө анх танилцжээ. Бусад солонгос залуусаас ялгаатай нь гэвэл Шин эхнэрээ их хүндэлж, харж ханддаг ба тэрээр гэр бүлийн бизнес ч нээж амжсан байна. Тэдний байгуулсан Монгол ресторанд Туяагийн аав, ээж тогооч хийх ба тэд одоо нэг гэрт амьдарч байна. Туяа хэлэхдээ “Манай нөхөр монгол хэл сурч байгаад би маш их баярладаг, энд байгаа монгол бүсгүйчүүд үүнийг сонсоод надад атаархдаг гэв”.

Гэвч “Гадаад эхнэрүүдийн эрх ашиг” ТББ-ийн тэргүүн Канг Сёонг Юү гадаад эхнэр бол гадаад эхнэр, “орлуулагч бүтээгдэхүүн” хэвээр үлдэнэ гэдгийг хүлээн зөвшөөрсөн юм. Таван жилийн өмнө эхнэрийнхээ соёлыг сурах гэж гүйнэ гэдэг асуудал бодохын ч аргагүй байсан бол одоо харин ч нөхрүүд нь тэтгэвэртээ гараад эхнэрийнхээ нутагт амьдарна гэж ярих болсон тухай БНСУ-ын Эрүүл мэнд, Халамж, Гэр бүлийн асуудлын Яамны мэргэжилтэн хэлэв. Энэхүү хандлагыг улсаас ч дэмжин тус яам Шин шиг эрчүүдэд түргэвчилсэн цагаачлалын үйлчилгээ, үнэгүй орчуулга, зөвлөгөө болон эхнэрийг нь амаржсаны дараа улсаас халамжлах гэх мэт үйлчилгээнүүдийг үзүүлж эхэлсэн байна.

Энэ жилээс эхлэн засгийн газраас солонгос эрчүүдтэй суусан эмэгтэйчүүдэд үнэгүй, нөхөртөө хэрхэн үйлчлэх гэх мэтэд хэрэг болох интернет хичээл заах болжээ. Эдгээр хичээлүүдийг Англи, Вьетнам, Япон, Монгол, Тай, Хятад хэлүүд дээр авах боломжтой. БНСУ шиг хүчтэй үндсэрхэг үзэлтэй газар эрлийз хүүхдүүд хүнд байдалтай байдаг гэж хатагтай Канг хэлэв. Гэвч тэрээр энэ явдал аажимдаа засарна гэж үзэж байна. Тус яам саяхнаас шинэ газартай болсон ба нэр нь “Олон улсын гэр бүлийг дэмжих төв” юм. Энэ газраас Монгол, Вьетнам, Узбекистан зэрэг улсуудын зан заншил, идэж уух дадал, соёлтой холбоотой гарын авлагыг үнэгүй тарааж өгөх болсон байна. Жишээ нь Монгол эхнэрүүд ихэвчлэн хоолны асуудалтай тулгардаг. Учир нь тэд ногоо, далайн хоол идэж чаддаггүй ба хонины махыг нөхрүүд нь жигшдэг байх юм.

Яамны мэргэжилтний ярьж байгаагаар салалт, зөрчилдөөн ч их гардаг. Үүний гол шалтгаан нь “зуучлагч” ирээдүйн эхнэрт нөхөр болох хүнийг голдуу дөвийлгөж баян хүн гэж танилцуулдаг байна. Үүнээс болон бусад зүйлсээс үүдсэн зөрчил улмаар даамжирч, хүчирхийлэл, хүн амины хэрэг болох нь цөөнгүй байдгийг газрын мэргэжилтэн Ким Сеонг Чол баталж байна.

Түүний хэлснээр дөрвөн гадаад эхнэр тутмын нэг нь хүчирхийлэлд өртөн, хатуу гарын амтыг байнга амсдаг байна. Гвангжу-ийн эмэгтэйчүүдийг хүчирхийллээс хамгаалах үнэгүй утас ч гадаад эхнэрүүдийн утас цохилтыг маш ихээр авах болжээ. Үүний нэг жишээ бол 19 настай вьетнам бүсгүй Хюнх Майг нөхөр нь үхтэл нь зодож 18 хавиргыг нь хугалан подвальдоо олон сараар нуусан шуугиант хэрэг юм.

Дээдсийн хүрээлэн