Гоо сайхны мэс заслын гаж донтонууд

Дэнлүүнээс нэг гарчихаараа буцаж орохоо мэдэхгүй одоо яах уу гэж тасралтгүй асууж шаардаад эзнээ солиоруулах шахдаг тийрэнгийн тухай үлгэрийг та лав сонсож байсан биз. Орчин үед иймэрхүү тийрэн шиг “Одоо яах уу, одоо ахиад нэг, за бас нэг” гэж донтуулдаг, зүгээр суулгадаггүй зүйл олон болж. Нэг жишээ нь гоо сайхны мэс засал. Дэлхий дээр жилд 18 сая орчим гоо сайхны мэс засал хийгддэг гээд та төсөөлөөрэй.

Гоо сайхны олон төрлийн хагалгаа байдгаас хөх томрууулах, хамрын хэлбэр засах, давхраа гаргах, зовхины хэлбэр засах, нүүрний арьс татаж үрчлээ арилгах гэсэн хагалгаанууд хамгийн их хийгддэг аж. Гоо сайхны хагалгаа нэг хийлгэсэн хүн боломж гарвал бас дахин хийлгэж биеийн өөр нэг хэсгийнхээ хэлбэр дүрсийг өөрчлөх гэж донтдог болохоор тийрэнтэй зүйрлэсэн хэрэг.

Гоо сайхны тийрэнгийн эрхэнд эр эм гэлгүй ордог. Нэгэнт тийрэнгийн эрхэнд орсон бол хэмжээ хязгаар, гоо сайхны мэдрэмж энэ тэр нь үгүй болоод хийлгэж л байвал болоо, бусад нь хамаагүй гэсэн зарчим үйлчилнэ. Жишээлбэл, Францын Богданов овогт ах дүү хоёр байна. Физикч мэргэжилтэй энэ хоёр их царайлаг, толгой нь гайгүй ажилладаг байсан гэнэ. Тиймдээ ч 1980-аад оны эхээр ТВ-ээр шинжлэх ухааны уран зөгнөлт зохиолын тухай өөрийн гэсэн шоу явуулдаг болж олны Францдаа олны танил, нэр алдартай хүмүүс болсон байна.

ТВ шоу хөтлөж байна гээд эрдэм мэргэжлээ орхиогүй тул 10 жилийн дараа буюу 1990-ээд он гарч рейтинг нь буураад ТВ шоу хөтлөхөө болилоо гээд хэн ч биш болсонгүй харин докторын зэрэг хамгаалах ажлаа амжилттай бичиж, цол хэргэмээ ч авсан байна. Гэхдээ яг тэр үед шоуны нэр алдар нь буурахад нүүр царай нь нөлөөллөө гэж үзээд анхны гоо сайхны мэс заслаа хийлгэжээ.

Өөрөөр хэлбэл тийрэнг дэнлүүнээс нь гаргасан байна. Нэг л гарсан бол тийрэн буцаж ордоггүй эзнээ ямагт ахиад, одоо бас нэг гэж зүгээр суулгдаггүй болохоор үр дүн нь нэг иймэрхүү.