Энэ чинь л миний хань…

Энэ өдрийн амар амгаланг эрье! Холын алслагдсан аймгийн сумын нэгэн малчин та бүхэнд хандаж байна. Манай сумын хүүхнүүд хөгшин залуугүй боломжтой нь хот руу боломж муутай нь аймгийн төв бараадаад алга болсон. Малаа сахисан хэдэн хөгшчүүд бас нутгаа орхихгүй гэсэн хэдэн эрчүүд үлдсэн. Хорин хэдхэн настай морин дэл дээр ниссэн эрчүүд хэцүүддэг юм байгаа биз дээ. Манай сумын дунд сургууль одоо болтол орос хэлээ заасаар байгаа. Энэ орос хэлний багш эгч л миний аминд орсон доо.

Хэдийгээр удаан ч гэсэн суманд маань интернэт орно. Эндээс орос хэл дээр танилцах зараар би ханиа олсон. Тиймээ миний хань Монгол биш Киргизийн сарнай. Хөдөө нутгийн борхон охин. Миний цэцэг шиг охины минь эх. Утаа багширсан Улаанбаатарыг илүүд үзээд төрсөн нутгаа орхиод явсан монгол хүүхнээс миний хань зуу дахин илүү сайхан. Цэлгэр талын сайхныг мэдэрдэг, эр хүнийг түшиж чаддаг бүсгүй хүнтэй учирсандаа би азтай Монгол эр.

Даруухан сайхан эхнэрээ өвөртлөөд хэвтэхэд л хүсэл төрдөг. Минийх гэж бодоход л хайр ундардаг. Төрсөн нутгаа гэсэн бидэнд өөр хэн хэрэгтэй юм бэ! Миний сайхан ханийг харийнх гээд хэлээд үз л дээ. Хот тэмүүлсэн хэдэн хүүхнүүд нь харин гадны хүнтэй суугаад нутагтаа дагуулаад ирнэ. Уг нь бэр нь болж тэндээ амьдрах ёстой биз дээ. Гарсан хүүхдүүд нь монгол хэл байхгүй. Хаашаа яваад байгаа юм. Харин бид эхнэр авсан. Харийн охиныг ханиа болгож авсан. Бид энэ нутагтаа эзэд нь. Тэртэй тэргүй энд монгол хүүхэн бараг байхгүй.

Дахиад ч эхнэр буулгаж авна. Тэгээд нутгаа диваажин болгоно. Тэр үед харин та нар нөхрүүдээ дагуулж ирж бидэнд ажиллаж цалин горьдож амьдраарай. Харийнх гээд байгаа бидний эхнэрүүд харин нутгаа хаяад дайжсан та нарын эзэд болсон байх болно. Учир нь бидний сэтгэлийг дэтээж, өврийг дулаацуулж, үр удмыг минь заргуулсан дагина тэд минь л байгаа юм. Тэд л жинхэнэ монгол эхнэрүүд за. Миний хань ийм л хүн. Хэнбугай нь ч харин гадуурхаж чадахгүй шүү. Бид дахиад олширно. Эхнэр болох сайн бүсгүйчүүд дахиад ирнэ. Энэ чинь л миний хань..