Гэр бүл дэх зөрчил юунаас үүдэлтэй вэ?

Гэр бүлийн амьдралд сайн сайхан, аз жаргалтай үе зөндөөн байдаг ч түүний хажуугаар мөн хэрүүл маргаантай хэцүү үе тохиолддог. Тэгвэл гэр бүл дэх зөрчил юунаас үүсдэг болохыг та мэдэх үү.

Насны онцлог:
Хайр сэтгэлд нас хамаагүй гэж ярьдаг. Гэвч бодит байдал дээр насны ялгаа их гардаг. Иймд, хэрэв та нас хол зөрүүтэй хүнтэй гэр бүл болсон бол амьдал чинь бодож байснаас чинь тэс өөр байж магадгүй тул бэлтгэлтэй байх хэрэгтэй.

Нийгмийн нөлөө:
Хүний амьдралд нийгмийн нөлөө хамгийн их байдаг. Хэдийгээр гэр бүлийн тайван тогтуун амьдралыг бий болгож чадлаа ч үүнд нийгэм яаж ч нөлөөлж магадгүй. Нийгэм хэдий чинээ ороо бусгаа байна хүний амьдрал тэр хэрээр донсолдог. Иймд нийгмийн элдэв нөлөөнд авталгүй бие биедээ халамжтай, хайр сэтгэлдээ үнэнч байх хэрэгтэй.

Оюун санааны хэмжүүр:
Өөрийгөө хэт доогуур үнэлэх нь гэр бүлийн амьдралын тэнцвэрийг алдуулдаг. Айл гэрийн эр хүн илүү ухаантай байж гэр бүлээ бүрэн бүтэн, эв найртай, элбэг дэлбэг хангалуун авч явах ёстой. Харин эмэгтэй нь гэр бүлийнхнээ халамжлан тэтгэгч, хайр энэрэлээр гийгүүлэгч аврагч байх ёстой.

Үндэс угсааны ялгаа:
Хэдийгээр бид чөлөөт ертөнцөд амьдарч байгаа ч үндэс угсааны асуудал хамгийн ярвигтайд тооцогддог. Зан заншил, уламжлал ахуйгаас эхлээд үндэстэн угсаатны хооронд ялгаа их бий. Иймд гэр бүл болохдоо үндэс угсаа, ёс журам, хэл соёл, ахуйн онцлог зэргийг харгалзах хэрэгтэй. Өөр үндэс угсааны хүмүүс гэрлэхэд сэтгэлзүйн бэрхшээл л хамгийн хүнд байдаг.

Санхүүгийн чадавхи:
Амьдрал дээр гэр бүлийн санхүү, арын ажлыг гол төлөв эмэгтэйчүүд зохицуулдаг. Учир нь тэд нарийн ширийн зүйл зохицуулах чадвар сайтай. Гэтэл ганц сарын цалингаа өгчихөөд л бүхэл бүтэн хаант улс бэлэглэчихсэн юм шиг илүү ихийг шаарддаг эрчүүд байдгийг мартаж болохгүй. Айл гэр санхүүгийн хувьд хэнээс ч хараат биш байх нь чухал. Үүнд эр хүний төрөлхийн авьяас чадвар, овсгоо самбаа, бас ноён нуруу л гол үүрэгтэй.