Гэр бүлийн тав тухтай байдал хайр халамжаас шалтгаалдаг

• Эрэгтэй хүнд эмэгтэй хүнээс илүү гэр бүлийн тав тухтай байдал илүү чухал байдаг. Аль болох эхнэрээ хажуудаа байлгах дуртай байдаг. Хэрэв эхнэр нь албан томилолтоор байнга явдаг, амралтын өдөр ажлаас нь дуудахад ихэд дургүйцдэг байна. 

Ажил дээрээсээ эхнэрээ гээд эрт гарч ирэхэд гэрт нь хүн байхгүй байвал сэтгэл нь гонсойж, таагүй мэдрэмж төрдөг. Энэ үед бүсгүй та гэр бүлийн бат бэх, аз жаргалтай байх үндэс нь гэрээ сахиад эмэгтэй хүн гэртээ суудагт оршдог бус харин хайр халамж, хүндлэл, харилцан бие биенээ ойлгоход оршдог гэдгийг ойлгуулж хэлэх хэрэгтэй.

Хэрэв энэ бүхэн тийм чухал биш юм бол түүний сэтгэлийг нь амраахын тулд эмэгтэй хүн хэдэн цаг гэрээ сахиж суух ёстой юм бол? гэсэн асуулт өөрийн эрхгүй бүсгүйчүүдэд маань бодогддог байна.

• Хэрэв эмэгтэй хүн ажил хийхгүй гэртээ суувал ширүүхэн дарга нар санаа сэтгэлийг үймүүлж, сэтгэл санаагаар унагаах, хамт ажилладаг хүмүүс нь түүний санал санаачилгыг хулгайлах зүйл гарахгүй төдийгүй тайван амгалан байж чадна хэмээн үзэх явдал ч бий. Зарим нэг эрчүүд эхнэрийгээ ажил хийхийг нь хориглодог нь дээрх зүйлд түлхэц болж өгдөг байна.

Нөхрийнхөө таны төлөө санаа зовж байгаа сэтгэлд нь талархах ёстой ч гэсэн үргэлж гэрийн мухар сахиад суух нь хэцүү шүү дээ. Харин ч эсрэгээрээ сэтгэл санаанд муугаар нөлөөлдөг талтай. Амьдралын шаардлагаар зайлшгүй ажиллаж, хүнтэй харьцаж, алдаж онож явах үе гарч ирэх болно.

• Ажил дээр тань дандаа бүсгүйчүүд байхгүй шүү дээ. Нөхөр тань хэн нэгэн эр хүнтэй таныг хардаад зогсохгүй ажлыг тань хүртэл таалахгүй байж болох юм. Гэтэл үнэн хэрэг дээрээ та нөхрөөсөө өөр эр хүнтэй учир ургуулах нь битгий хэл аль болох эрчүүдээс зайгаа авч харьцдагыг чинь тэр бүр мэдэхгүй шүү дээ.

Иймээс түүнд энэ талаархи бодлыг нь толгойноос нь авч хаяхад тусалж, өөрөөс нь өөр хэн ч хэрэггүй гэдгийг хэлж ойлгуулах хэрэгтэй. Түүнчлэн нөхрийнхөө өөрийгөө үнэлэх үнэлэмжийг нь өргөж өгөхийг хичээх нь зүйтэй.

/Хань/