Эхнэрээ жирэмсэн үед ингэж халамжлаарай

Эр нөхрийнхөө дэргэд амаржих нь европт өргөн дэлгэрсэн үзэгдэл. Мөн хүүхэд төрөхөд эцгийг бэлдэх асуудлыг гэр бүлийн дотор маш чухалд үздэг бөгөөд эрчүүдийн 99,6 хувь нь төрөх үед тэдний оролцох нь эцгийн нэр хүндийг өргөдөг гэж үздэг. Хэдийгээр манайд ийм уламжлал дэлгэрээгүй ч эрчүүд эхнэрээ жирэмсний явцад нь анхаарч халамжлах ёстой.

Гэртээ шинэ хүн нэмэх гэж байгаа эрчүүлд зөвлөхөд өөрийгөө тайван, жирийн байлгаж, жирэмслэлтэд дасан зохицох үе / анхны гурван сар/ хамгийн хэцүү үе байдгийг санаж явах хэрэгтэй. Энэ үед янз бүрийн тааламжгүй зүйл гарч ирэх боловч эрүүл мэндэд аюулгүй. Анхны, ер нь цаашдын жирэмслэлтийн үе шатны үед эхнэрээ хүнд юм өргөх, сэтгэл нь хямрахаас сэргийлэн, уурлуулахгүй байх хэрэгтэй.

Жирэмсэн эхнэртээ эрчүүд голлон юуг анхаарах вэ?

• Өөрийгөө болон эхнэрээ өвдүүлэхгүй байх. Учир нь ямар ч өвчнөөр өвдсөн үрийн хөгжилд муугаар нөлөөлнө.
• Эхнэрээ хоёр хүний хоол унд идэхийг шаардах хэрэггүй.
• Хожим нь төрсний дараа эхнэртээ биеэ муу арчилж, таргаллаа гэж ихэнх эрчүүд гомдоллодог.
• Ухаалаг эр жирэмсэн эхнэрээ хүссэн ч байсан амттан чихрээр хооллодоггүй. Жимс, шүүс, шанцай, сүү, сүүн бүтээгдэхүүн, ялангуяа тараг онцгүй ач холбогдолтойг санаарай.
• Тамхи татдаг бол хаях, эсвэл эхнэрийнхээ дэргэд татахгүй байх
• Гэр бүлд шинэ хүн нэмэгдэх гэж буй нь аж төрөх ёсонд нөлөөлнө. Эхнэрээ орой бүр нэг цаг салхинд гаргах хэрэгтэй. Жирэмсний сүүлийн үед агаар дутах, нойргүй болох явдал илэрч болно.

Жирэмсэн үед усан дотор суулгүй шүршүүрээр угаах тохиромжтой. Дашрамд хэлэхэд эрчүүд энэ үед халуун усныхаа өрөөнд халтирахгүй, иржгэр гадаргуутай жижиг нийлэг хивс дэвсэж өгөх хэрэгтэй.

Архийг ирээдүйн эцэг, эх бүрмөсөн цээрлэх хэрэгтэй. Тамхийг зарим нэгэн талаар зөвшөөрч болох авч архины талаар хоёрдмол бодол байж болохгүй. Архи нь төрөх хүүхдийн мэдрэлийн тогтолцоонд өөрчлөлт гаргах бүрэн боломжтой. Жирэмсэн үед хүчээ гамнаж, төрөх үед бий болдог тэр асар хүчтэй шалгалтад биеэ, хүчээ бэлтгэх хэрэгтэй. Олонх эмч төрөлтийг уурхайчны хүнд хүчир ажилтай адилтгаж үздэг.